Францияда 2016 йилда бўлиб ўтадиган футбол бўйича Европа чемпионатининг рамзи бўлган ўйинчоқ болага исм беришди.
Эслатиб ўтамиз, Франция миллий терма жамоаси футболчилари майдонга кийиб тушадиган кўк рангдаги 16 рақами остидаги футболка, сеҳрли бутсалар ва чемпионат эмблемаси акс этган қизил плашда тасвирланган болакай бўлиб ўтадиган мусобақанинг рамзи этиб танланганди.
Бироқ унга ҳанузгача исм қўйилмаган эди. Унга учта исм таклиф қилинганди: Дриблу (Driblou), Голикс (Goalix) ва Супер Виктор (Super Victor). 26 ноябрь куни овоз бериш орқали унга Супер Виктор номи берилди.
Эслатиб ўтамиз, Европа чемпионати Франциянинг ўнта шаҳарида 2016 йилнинг 10 июнидан 10 июлига қадар бўлиб ўтади. Тарихда биринчи маротаба мусобақанинг финал босқичида 24 та терма жамоа иштирок этади.
