Бугун, 29-ноябрь куни Марказий Осиё давлатлари раҳбарларининг иккинчи Маслаҳат учрашуви бўлиб ўтади.
Шу муносабати билан кеча бир қатор қўшни давлат раҳбарлари Ўзбекистонга келишди.
Хусусан, даставвал, Ўзбекистон Республикаси Президенти Шавкат Мирзиёевнинг таклифига биноан Туркманистон Президенти Гурбангули Бердимуҳамедов амалий ташриф билан мамлакатимизга келган эди.
Шундан сўнг бирин-кетин Тожикистон Республикаси Президенти Эмомали Раҳмон, Қозоғистон Республикасининг Биринчи Президенти — Элбоши Нурсултон Назарбоев, Қирғизистон Республикаси Президенти Сооронбай Жээнбековлар Марказий Осиё давлатлари раҳбарларининг иккинчи Маслаҳат учрашувида иштирок этиш учун Тошкентга келди.
Олий мартабали меҳмонларни Ислом Каримов номидаги Тошкент халқаро аэропортида Ўзбекистон Республикаси Бош вазири Абдулла Арипов кутиб олди.
Бугунги учрашувда сиёсий, савдо-иқтисодий, инвестициявий, транспорт-коммуникация, маданий-гуманитар ва бошқа соҳаларда минтақавий ҳамкорликни кенгайтириш масалалари муҳокама қилинади.