"Ўзбеккино” Миллий агентлиги телевизион эфир вақтини тўлдириш учун давлат ва нодавлат телеканалларга кинофонддан 750 та материал тақдим этади. Акциянинг биринчи босқичи 250 дан ортиқ киноматериаллар - ҳужжатли ва бадиий фильмлар (2015-2018 йиллар), мультфильмлар (2010-2018 йиллар), қисқа метражли фильмлар ҳамда болаларнинг севимли “Зумраша” киножурналининг янги сонларини (2016-2018) ўз ичига олади.
Шунингдек, "Ўзбеккино" телеканалларга тақдимоти яқин икки ҳафта ичида ўтказилиши мўлжалланган 30 та янги фильмни тақдим этади. Улар орасида “Қўқон шамоли”, “Авлоний” , “1 август” ва бошқалар бор.
– Бизнинг мақсадимиз – мамлакатимиз аҳолиси, айниқса карантин тадбирлари давомида уйда қолаётган ёш авлод ва болалари билан қолаётган ҳамюртларимизнинг бўш вақтини мазмунли ўтказишдан иборат, – дейди “Ўзбеккино” Миллий агентлиги бош директори Фирдавс Абдухолиқов. – Биз давлат ва нодавлат телеканаллар таклифимизни қўллаб-қувватлаганликларидан миннатдормиз. Аминманки, бундай акциянинг биргаликда ўтказилиши уйда ўтирганларнинг мазмунли дам олишини таъминлаш баробарида, миллий киномаҳсулотларимизга бўлган эътиборни оширади.
Эслатиб ўтамиз, Ўзбекистон ҳукуматининг коронавирус тарқалишининг олдини олиш бўйича чора-тадбирлар ҳақидаги тавсияларидан келиб чиқиб, мамлакат миқёсида оммавий кўнгилочар томошалар, жумладан, кинотеатрлар фаолияти ҳам тўхтатилган.
Шу билан бирга карантин кунлари ўқув муассасалари ёпилган, байрам тадбирлари бекор қилинган.
