Турк киноижодкорлари билан янги — "Мовароуннахр" кинолойиҳаси ишлаб чиқарилиши режалаштирилмоқда. Бу ҳақда Кинематография агентлиги хабар берди.
Бугун Ўзбекистон Миллий кино санъати саройида Кинематография агентлиги Бадиий кенгашининг турк киноижодкорлари билан яратилиши режалаштирилаётган "Мовароуннахр" кинолойиҳаси бўйича муҳокама бўлиб ўтди. Унда Агентлик раҳбарияти, ва бадий кенгаш аъзолари ва эксперлари Седат Сағиркая бошчилигидаги турк киноижодкорларидан иборат делегация билан лойиҳа бўйича музокоралар ўтказди.
Учрашув аввалида меҳмонлар TRT Avaz телеканали бош координатори Седат Сағиркая, продюсер Ўмер Беёғлу, тарихчи ва маданиятшунос Иса Акпинар, режиссёр Экрем Арслан ва ТРТ Ўзбекистон ваколатхонаси раҳбари Низам Шаҳин киносаройни кўздан кечириб, илиқ фикрлар билдирди.
Учрашувда "Мовароуннахр" деб номланган ҳужжатли сериал ишлаш масаласи муҳокама қилинди. Таклиф этилаётган лойиҳага кўра, Мовароуннаҳр ўлкасининг географияси, фиқҳ илми, диний таълимотлар, фалсафа, архитектура ва ҳаёт тарзига бағишланган 10 қисмли сериал ишланади.
Ҳужжатли сериал лойиҳаси Бадиий кенгаш томонидан илиқ қабул қилинди. Шу мавзу юзасидан лойиҳа тақдимоти ўтказилгач, турк киноижодкорлари томонидан Ўзбекистонда тарихий манзиллар, актёрлар, техник кўмак масаласида ёрдам сўралди. Таклиф Бадиий кенгаш аъзолари томонидан қўллаб-қувватланиб, ҳужжатли сериални суратга олиш ишларида ўзбек ва турк олимлари ҳамкорликда фаолият юритиши кераклиги таъкидланди.
