Таҳририятимизга “Менинг юртим” телеканали орқали ҳар ҳафтанинг сешанбасида эфирга бериладиган “8-синов” кўрсатуви ҳақида эътирозли қўнғироқлар бўлгани сабаб, ушбу кўрсатув ҳақида батафсилроқ ёзишга аҳд қилдик...
“Менинг юртим” телеканалини мароқ билан томоша қиламан. Унда турли ёшдаги томошабин учун мўлжалланган кўрсатувлар талайгина. Бунинг учун телеканал ижодкорларига ўз миннатдорчилигимни билдираман. Таҳририятга қўнғироқ қилишимдан яна бир мақсад бор. Аниқроғи, ҳар ҳафта эфирга бериладиган “8-синов” кўрсатувини анчадан бери кузатиб бораман. Ва ҳайратимни яшира олмайман. Боиси дастурга ташриф буюрган меҳмон савол-жавоб шартидан муваффақиятли ўтганини кўриб, сунъийликни ҳис қиламан. Масалан, куни кеча “Хўжа” гуруҳи яккахони Иззат Ибрагимов билан бўлган кўрсатувни олайлик. Хонанда тез айтишни шу даражада тез такрорлаяпти-ки, уни кузатиб туриб беихтиёр “тайёргарликсиз қандай қилиб, бу даражада тез айтиш мумкин?” деган савол туғилади. Кўрсатув номига мос тарзда ҳақиқий синов тарзида бўлиши керакмасми?
Нигина Акбарова, Тошкент шаҳри
Таҳририятга бўлган бир нечта қўнғироқлардан сўнг телетомошабинлар фикри билан қизиқдим. Сўровим шуни тасдиқладики, “8-синов” кўрсатуви фақатгина “яширин кузатув” шарти билан томошабинга қизиқ экан. Қолган шартлари борасида “Сунъийлик бор, кўрсатув меҳмонлари билан аввалдан келишиб олингандек”, деган фикрларни эшитдим...
Кўрсатув телетомошабин учун тайёрланар экан, демак улар доим ҳақ. Шундай экан, мухлислар ва эфир вақтини зое кетказишдан нима наф? Мухлисларнинг эътирозлари юзасидан кўрсатув муаллиф ва бошловчи Парвиз Фаттоевнинг фикрлари билан қизиқдик.
— Тўғри. Лекин кўрсатув интеллектуал эмас, шоу тарзида бўлгани учун иштирокчи тўғри жавоб топгунига қадар ёрдам бераман. Мақсад кўрсатув меҳмонини дунёқараши, қанчалик билимга эга эканини синаш. Шу боис тўғри жавоб топиш учун маълум вақт берилмайди. Балки шунинг учун ҳам бу жараён аввалдан келишиб олингандек туюлар.
— Тайёрлаётган кўрсатувингиздан ўзингизнинг кўнглингиз тўляптими?
—Очиғи, кўрсатувдан кўнглим тўлмаяпти. Боиси иш бошлашимдан аввал ижодий ва ташкилий режалар бошқача эди. Бугунги кунга қадар кўрсатувнинг 18 сони эфирга берилди. Бу муддат давомида кўрсатувни тайёрлашда анчагина тўсиқларга дуч келдим. Аниқроғи, кўрсатув муаллифи ва бошловчиси бўлишимдан ташқари иш юритувчи, компьютер графикаси муҳандиси, монтаж устаси ва ҳатто ҳайдовчиликкача ўзим бажаришимга тўғри келяпти. Бу юмушларнинг бари вақт олгани сабаб, кўрсатув сифатига ўз таъсирини кўрсатмай қолмаяпти. Энг қизиғи, шу кунга қадар бирор марта молиявий тарафдан кўмак олмадим.
— Аввал мана шу камчиликларни бартараф этиб, сўнг томошабинларга тақдим этганингиз мақсадга мувофиқ-ку. Эфир ва томошабин вақтини ўғирлашга виждонингиз қандай йўл қўяди?
— Фикрингизга тўлиқ қўшилмайман. Чунки телеканалнинг ижтимоий тармоқларидаги саҳифалари орқали томошабинлар озми-кўпми илиқ фикрлар билдиришади. Синов эфиридан бошланган кўрсатувни ярим йўлда тўхтатиб қўйиш томошабинга нисбатан ҳурматсизлик, деб ўйлаганман. Ҳолбуки, синов эфиридан сўнг молиявий кўмак бўлади, деб ўйлагандим...
— Қачонгача молиявий кўмак кутиб ўтирмоқчисиз, кўрсатувнинг кейинги тақдири қандай бўлади?
— Кўрсатув вақтинча тўхтатиб турилади. Раҳбарият томонидан кўмак берилгач, сиз таъкидлаётган сифат даражасига жавоб берадиган кўрсатув билан эфирга қайтмоқчиман.
