Валера Багиров ва унинг икки шериги бу ҳақиқатга сал кечроқ, тунги Тошкент сайридаги шўхликларига гувоҳ бўлиб қолган “баджаҳл амаки”дан қочаётиб амин бўлишди. Аслида у амаки у қадар баджаҳл эмас, шунчаки тонг саҳарда велосипедда учишни хуш кўрувчи отахон эди холос. У дафъатан шубҳали ивирсиб юрган йигитларни кўриб, уларнинг нияти бежо эканини пайқади. Аммо, бу пайтида улар битта “Дамас”ни шип-шийдам қилиб бўлишганди.
Қойилмақом учлик
…Алексей ва Жанна Валеранинг яқин қадрдони эдилар. Улар аввалига учовлон яхшигина улфатчилик қилишди. Кейин тўрт девор ичида ўтиравериш жонларига тегди шекилли, кўчага “овга” отланишди. Тўғрироғи, уларни бу “йўл”га Валеранинг ўзи бошлади.
-Сизлар ҳам юрибсизлар-да, ҳақиқий “иш” қанақа бўлишини кўрсатаман сизларга!
-Биз нима қилишимиз керак? – сўрашди “шериклари”и.
-Ҳеч нарса, хавф-хатар туғилганда, менга “гудок” ташласангиз, кифоя.
Шу тариқа болалар йўлга чиқишди. Йўл-йўлакай дадиллик учун битта шишани бўшатишди. Шундан сўнг, Валеранинг таъбири билан айтганда “араваларни енгиллатиш” – яъни енгил машиналарни тўнашга киришишди.
Хамир учидан патир
Пойтахнинг чекка даҳаларидан бири. Дарвозалардан бирининг олдида сутранг “Дамас” турарди. Ундан сал нарида, кўчанинг бошида эса, пўлатранг “Мерседес”. “Бошладик” шивирлади Валера шерикларига.
Ишни “Дамас”ни шилишдан бошлашди. Багиров қўлидаги отвертка билан орқа тарафдаги ён ойнани кўчириб олди. Кейин эса, эшикни очиб, машина ичига кирди. Магнитофон анжомлар тахтаси устида турар, аммо панель ғаладон ичида экан. Валера “ўлжаларни қўйнига уриб, ташқарига чиқди.
Энди навбат “Мерседес”га келганди. Худди аввалги усул билан орқа ён ойнани кўчириб олгач, яна осонгина машина ичига кириб олди. Бироқ, машина ғаладонидан DVD-дисклар чиқди, холос. “Начора, йўқдан кўра ҳарна” дея дискларни қўйнига солди Валера.
Бароридан келмаган “ов”
Шу пайт кимнинг “тўхта” деган хитобини эшитиб, аввал жойида қотди. Кейин эса дискларни йўлма-йўл сочганча, қочиб кетди. Весипеддаги кимса эса, уни анчагача таъқиб қилиб борди. Ўз “раҳбарлари” учун қуённинг ини минг танга бўлганини кўрган Алексей ва Жанна ҳам жуфтакни ростлашди.
Шундан сўнг улар Валеранинг уйига етиб келишди ва уйқуга кетишди. Улар учун бу “ов” анча омадсиз келганди. Улар нотаниш велосипедчидан қочиб кетишаркан, йўл-йўлакай анча-мунча нарсаларни тушириб қолдиришган, бу эса, уларнинг қўлга тушишида, жиноятнинг тезроқ очилишида ёрдам берган.
Маълум бўлишича, В.Багиров илгари ҳам худди шу тахлит жиноятларни бир неча маротаба содир этган. Бир қанча машиналарнинг ойнасини кўчириб, унинг ичидаги қимайти бир неча миллион сўмлик турли қимматбаҳо буюмларни ўғирлаб кетган.
Ниҳоят, “бузоқнинг қочгани сомонхонагача” деганларидек, бу жиноий гуруҳнинг фаолтиятига ҳам чек қўйилди. Эҳтимол, Валера ва унинг шериклари бу жазодан сўнг, ўзларига тегишли хулоса чиқаришар?
О. Фозилова, журналист
Мақола қаҳрамонларининг исм-фамилиялари ўзгартирилган.
