Алоқа тарихи музейида Электрон таълим юзасидан Латвия давлати тажрибасини ўрганиш мақсадида Латвия “Электрон ҳукумат” тизимининг собиқ вазири Ина Гудели билан учрашув бўлиб ўтди.
Учрашув “Электрон ҳукумат” тизимини ривожлантириш маркази томонидан ташкил этилди.
Учрашувда Олий ва ўрта махсус таълим вазирлиги, Халқ таълими вазирлиги, ДТМ, Тошкент ахборот технологиялари университети мутахассислари иштирок этишди.
Ина Гудели Е-biznes дастурининг директори, Бизнес маъмурияти ва Рига Олий иқтисод мактабининг раҳбари. “Lattelekom” ОАЖда маркетинг алоқалари лойиҳасининг раҳбари, “Apollo” интернет хизматлари кўрсатиш лойиҳасининг раҳбари, Давлат девонхонаси, ахборот жамияти бошқармасида раҳбар, электрон бошқарув ишлари вазирлиги котибиятида раҳбар, 2006 йилдан электрон бошқарув ишлари вазири лавозимларида фаолият олиб борган.
Электрон бошқарув ишлари вазирлигининг собиқ вазири Ина Гуделе “Электрон таълим. Бутун умр таълим олиш” мавзусида маъруза қилиб, инсон умри давомида доимо илм олишга интилиши кераклигини, бунга асосий сабаб эса замон тезкорлик билан ўзгараётганлиги, инсон замондан ортда қолмаслиги кераклигини таъкидлади. Бунга мисол қилиб у АКТ билимлари бўйича сертификат олган 82 ёшли Латвия фуқаросини мисол қилиб келтирди.
Ина Гуделе 5 йил давр мобайнида Латвия Таълим вазири вазифасида ишлаб, таълим тизимини электрон шаклга ўтказиш анча қийин ва узоқ жараёнлигига ишонган. Унинг фикрича, мансабдор шхсларни янгича услубда ишлаш ва фикрлашга ўргатгунча “қора сочларига оқ тушган”. Бу ҳолат инсон руҳиятига хос омил бўлиб, инсон ўз табиатига кўра янгиликка кўникиши қийин бўлади.
Учрашув иштирокчиларидан бирининг, “Электрон ҳукумат тизимини ривожлантиришда БЖРсиз тасаввур қилиб бўлмайди” деган фикрга қандай қарайсиз?”- деган саволига, Ина Гуделе, “Электрон ҳукумат жараёнини ташкил этишда фақат ахборот технологияларигагина таяниб қолмаслик керак. Бу фақат ушбу жараённинг мувафаққиятини қисман ташкил қилади. Қайсидир давлатнинг тажрибасини ўзга мамлакатга ҳам шундай кўчирибгина олиб қўллаб бўлмайди. Ҳар бир мамлакатнинг ўзига хос жиҳатларини эътиборга олган ҳолда яратилган электрон ҳукумати мавжуд бўлади.
Ҳозирги кунда ҳам Латвиянинг пойтахти Рига АКТ мутахассисларини етказиб беришда етакчи ўринлардан бирида туради. Бугун Ригада 26 та Олий ўқув юртлари фаолият олиб бориб, улардан 17 таси АКТга ихтиссослашган.
Латвиядаги мактабларнинг ҳар бири компютер синфлари билан жиҳозланган, мултимедиа лабораториясига эга. Шунингдек, ота-оналар фарзандларининг ўзлаштиришини мобил илова орқали билиб олиш имкониятига эга. Бу эса Латвия электрон ҳукуматининг ўзига хос жиҳатларидан биридир.
Шунингдек, Ўзбекистон “Электрон ҳукумат тизимидаги” “Таълим” ахборот комплекс тизими ҳақида БМТДнинг “Ўзбекистонда давлат хизматлари сифатини яхшилаш учун электрон ҳукумат тизимини ривожлантириш” лойиҳасининг лойиҳа менежери Бунёд Авлиёқулов маълумот бериб ўтди.
