Жорий йилнинг 19 июль куни Асака автомобил заводи ташкил этилганига 19 йил тўлади, дея хабар беради "Ўзавтосаноат" АК.
Завод фаолиятининг биринчи йилида 25 минг 300 та енгил автомобил ишлаб чиқарилган бўлса, кейинги йили бу кўрсаткич 64 мингдан ошди. 2010 йил давомида 217 минг 733 дона автомобил заводнинг юртимиздаги ва хорижий мамлакатлардаги расмий дилерлик корхоналари орқали ўз эгаларига етказилган бўлса, 2011 йилда 222 мингта автомобил ишлаб чиқарилган. 2012 йилда эса бу кўрсаткич 236,2 минг донани ташкил этган. Жаҳондаги мана-ман деган автомобил концерни ва компаниялари халқаро молиявий-иқтисодий инқироз туфайли ишлаб чиқаришни кескин камайтираётган бир пайтда, йилдан-йилга ўсиб бораётган бу рақамларнинг долзарб аҳамиятга эга эканини тушуниш учун соҳанинг билимдони бўлиш шарт эмас.
2013 йилда жами 246,6 мингта автомобил ишлаб чиқарилган бўлиб, шундан 157,7 мингга яқини мамлакатимиз ички бозоридаги харидорларга етказиб берилган бўлса, қолган 90,8 мингтага яқин автомобил хорижга экспорт қилинган. Ўтган йиллар давомида “GM Uzbekistan” автомобил заводида ишлаб чиқарилаётган автомобиллар сони йил сайин ошиб боргани эса корхона жамоаси маҳсулотларининг нафақат сифат даражасини яхшилашга, балки уларнинг сонини кўпайтиришга ҳам эришганини кўрсатади. Ўтган 2014 йилда эса 245,6 минг дона автомобил ишлаб чиқарилиб, шундан 55,2 мингтаси хорижга экспорт қилинган. Жорий 2015 йилнинг биринчи ярмида “GM Uzbekistan” автомобил заводида ишлаб чиқарилган автомобиллар сони 119412 донани ташкил этди.
Чарос Омонова тайёрлади.
