Муниса Ризаева жуда ҳушчақчақ, хушмуомила, ҳамма тил топишиб кета олади. Эстрада оламида ўз ўрнига эга бу хонанда ўзига хос, ҳеч кимникига ўхшамас мусиқий йўналиши билан мухлислар эътиборини тортди. Эстрада оламида ўтган йиллар эса унинг феъл- атворини чархлади десак адашмаймиз. У бугун аввалгидек эмас. Эҳтиёткорликни ҳамма нарсадан устун қўяди. Ички дунёсининг ўзгариши билан бир қаторда бу хонанданинг ташқи гўзалиги ҳам ўзгариб бораётганини сезиш қийин эмас. Суҳбат давомида турли мавзуларда гаплашиб, сиз учун хонанданинг ички дунёсини очишга ҳаракат қилдик. Ўйлаймизки, суҳбат сизни бефарқ қолдирмайди.
— Доимгидек гўзалсиз!
— Ташаккур!
— Назаримда ташқи кўринишингиз илгаригидек эмас...
— (кулиб) Агар пластик жарроҳликни назарда тутаётган бўлсангиз, ҳа, гапингиз тўғри. Бурнимнинг устки қисмидаги бўртиб чиққан суяк экранда ва суратларда бироз хунук кўринар эди. Илгари клип ва концертларни тасвирга олиш ишларида тасвирчиларимиз, монтаж усталари керакли ракурсда ишлай олмай жуда қийналишарди. Қолаверса, ўзим ҳам баъзида бундан бироз уялардим. Бу ноқулайликдан бирйўла қутилиш учун пластик жарроҳлик қилишга аҳд қилдим. Болалигимдан орзу қилган ишимни амалга оширдим. Менимча энди бурнимнинг кўриниши чакки эмас.
— Фикримча, пластик жарроҳлик бироз қалтис иш. Ҳеч ким бу иш омадли бўлишини кафолатламайди...
— Гапингизга юз фоиз қўшиламан. Очиғи, бу нарсадан ўзим фойдаланган бўлсам ҳам бошқаларга маслаҳат бермайман. Чунки инсон саломатлиги билан ҳазиллашиб бўлмайди. Мен эса санъаткорман. Бир кунда керак бўлса 24 соат камера қаршисида ишлайман. Ўйлашимча, мухлисларимиз бизни доим гўзал ва мафтункор ҳолатда кўриши керак. Аммо нима бўлишидан қатъий назар табиийлик доим урфда. Мен ҳам табиийлик тарафдориман.
— Эшитишимча, бир марта пластик жарроҳлик операцияси ўтказган киши кейин ўзини тийиши қийин бўларкан. Яъни бир марта ўзини “гўзаллаштирган” аёл ташқи кўринишига яна қандайдир ўзгартириш киритгиси келаверар экан...
— Жуда тўғри! Мен ҳам сиз айтгандек ўзини тиёлмай гўзал ҳуснига салбий ўзгартириш киритиб қўйланларга гувоҳ бўлганман. Менимча аёл иродали бўлиши керак. Ўзининг ички мени билан курашиб, ўзига ўзи “бўлди, тўхта” дея олиши лозим.
— Сиз-чи, ўзингизга “тўхта” дейишга кучингиз етадими?
— Албатта. Мен бу ишга биринчи ва охирги марта қўл урдим. Ташқи кўринишимга эса спорт билан ҳам ўзгартириш кирита оламан.
— Концерт кунларини эълон қилдингиз. Тайёргарлик авжида эканлигига ишонамиз. Бизни нималар кутяпти?
— Яккахон концертим давомида сюрпризларим кўп. Аммо уларнинг барини амалга ошириш учун ҳозирча имконият бироз камроқ. Ўзим истаган барча замонавий ускуналарни Ўзбекистонга олиб киришнинг иложи бўлмаяпти. Шунинг учун ҳам 2015 йилги концертда режаларимизнинг бир қисминигина амалга оширамиз. Аммо айнан мана шу айтилаётган қисмнинг ўзида ҳам мухлислар бир олам қувонч олишади деб ўйлайман. Ўтган йилги концертим мен учун катта бир синов эди. Бу синов олди мени синаганлар ҳам, ҳафсаламни пир қилганлар ҳам, устимдан кулиб қочганлар ҳам бўлди. Ҳар бир ишнинг биринчисида ўзига яраша қийинчиликлар бўлади. Биринчи яккахон концертим бўлгани учун йўл қўйган хатоларимга кўз юмилди. Иккинчисида бундай бўлмаслигини биламан. Бу гал ҳаммаси ўзгача. Ҳеч қандай хатоларсиз, ўзим истаган шоу дастурни тақдим этишга ҳаракат қиламан.
— Ҳар бир яккахон концерт олдидан хонандаларнинг барчаси “унутилмас шоу концерт”, “бунақаси ҳали ҳеч кимда бўлмаган” каби гаплар билан реклама қилишади. Кўпинча бу шунчаки гап бўлиб қолаверади...
- Биласизми, мен бировларни ёмонлаб ўзимни мақташдан йироқман. Аммо концертнинг муваффақияти учун аллақачон ҳаракат бошланган. Катта ваъдалар бермайман. Бироқ Муниса Ризаеванинг концертида кутилаётган сюрпризларнинг бари амалга ошади. Концертимда битта саҳна қурилиши билан кифояланиш ниятим йўқ. Декорация тинимсиз ўзгариб туради. Рақслар бўйча чет эллик хореографлар билан ишлаяпман. Балки Райҳоннинг концерт дастурларида кўришга одатланганимиз — ҳақиқий шоу даражасида ишлай олмасмиз, лекин дугонамнинг концертидаги шоунинг ҳеч бўлмаганда ўн фоизини кўрсатиб беришни истардим. Чунки мен учун шоу-дастур деганда Райҳоннинг концертларидан аълоси йўқ.
- Ўтган йилги концертингиздаги либосларингизни томошабинлар тушунарсиз дея танқид қилишганди...
— Ўзим аслида шунақа тушунарсизман. Менинг либосларимни ҳамма ҳам тушуниши қийин. Шунинг учун концертда ўз дунёимдан келиб чиққан ҳолда либослар танладим. Бу йилги концертда профессионаллар билан ишлашга қарор қилдим. Энди стилист дизайнер Ҳилола Шер билан ишлаяпмиз. Саксон фоиз либосларимнинг муаллифи у.
- Интернетда “Муниса жонли ижрода концерт бермоқчи эди, лекин концерт баннерларида фонограммадан фойдаланилади деб ёзибди” деган гап-сўзлар кўпайди.
- Қонунда кўрсатилишича, концертда ҳатто кичик мусиқий овозда ҳам фонограммадан фойдаланган санъаткор бу ҳақда баннерда ёзиши шарт. Биласизки, менинг қўшиқларимда мусиқага кучли сайқал берилади. Деярли барча қўшиқларимда замонавий компьютер имкониятларидан фойдаланган ҳолда безак берамиз. Бу мусиқаларни эса жонли ижро этишнинг иложи йўқ. Лекин концертда 100 фоиз жонли тарзда қўшиқ куйлайман. Бирор қўшиғимда овозим фонограмма орқали янграмайди.
— Бугун Мунисани ҳаддан зиёд кўп кўряпмиз. Рекламада, ижтимоий роликларда, клипларда, кўрсатувларда... Одамларнинг меъдасига тегиб қолишидан кўрқмайсизми?
— Рекламанинг зарари йўқ. Қанча кўп кўринсам ҳам мухлислар мендан янгилик кутишади. Доим янги қўшиқ сўрашади. Шунинг учун ҳам рекламанинг ортиқчаси бўлмайди деб ҳисоблайман. Айниқса бизнинг соҳада.
— Ёш хонандалардан бири Саида (Собиқ “Аъло” гуруҳи аъзоси) сизга ёзилган қўшиқни куйлагани учун ўртангизда келишмовчилик юзага келибди...
— Ҳа, у куйлаб чиққан “Love” қўшиғини биринчи бўлиб менга эшитиришганди. Аммо менга мақул бўлмади. Мен учун бундан ҳам яхшироғи керак дегандим. Орадан бироз вақт ўтгач ўша қўшиқни Саида куйлабди. Аввалига ҳайрон бўлдим. Кейин демак шундай бўлиши керак экан деган тўхтамга келдим. Аммо ҳамманинг ўз йўли ва йўналиши бўлиши керак деб ҳисоблайман. Шу воқеадан кейин Саида билан гаплашиб олганмиз. Мен уни илгаридан Светлана (Саиданинг асли исми Светлана) деб таниганман, муносабатларимиз ҳам худди олдингидек сақланиб қолган. Биз ҳамкасбмиз холос.
— Кўп йиллик ҳамкорингиз Элдор Қаюмов билан ҳам анча вақтдан буён гаплашмай қўйганингиздан хабаримиз бор...
— Баъзи келишмовчиликлар туфайли ҳамкорликка ҳам, дўстона муносабатларга ҳам чек қўйгандик. Бир йил бир- биримиз билан умуман гаплашмадик. Аммо бугун муносабатлар тикланди. Келишмовчиликларнинг олди олинди. Тез кунларда Элдор Қаюмов муаллифлигида ёзилган “Сакраменто” деб номланган қўшиқ куйлайман.
— Хонанда Манзура билан ҳам муносабатларингиз бузилибди...
— Очиғини айтсам, Манзура билан муносабатларимизга нима бўлди — ўзим ҳам ҳайронман. Балки билиб-билмай хафа қилгандирман. Аммо нима бўлганда ҳам мен бу хонандани жуда ҳурмат қиламан. Қўшиқларининг ҳақиқий мухлисиман.
— Сўнгги клипларингиздан бирида қишлоқ келини образида чиқдингиз...
- Айнан мана шу образда намоён бўлишимни ҳеч ким кутмаган эди. Шунинг учун ҳам бу клипим муваффақиятли чиқди деб ҳисоблайман. Мен ҳеч кимнинг тасаввурига сиғмаган нарсани кўрсатиб бера олдим.
- Ҳаётда ҳам қишлоққа келин бўлишингиз мумкинми?
— Албатта...
— Бироз ошириб юбормадингизми? Ҳаёт кино ва клипдаги воқеалардан анча узоқ. Келин бўлсангиз истайсизми-йўқми касбингизни бироз чеклашингизга тўғри келади.
— Айни кунларда оиламизда бўлаётган гап-сўзлардан хабардордек гапирдингиз. Тўғри, ҳамма ишни бир варакайига олиб бориш қийин. Уйимизга келган совчилар касбим борасида ўз талабларини билдиришяпти. Балки оила қурганимдан кейин ишимда ўзгаришлар бўлар. Балки фақат қўшиқ куйлаб, клипларим билан мухлисларимни хушнуд этарман, яъни тўйларга чиқмасман...
— Ишонч билан гапиришингизга қараганда тўйга оз қолган шекилли...
(Муниса саволга жавоб бермай шунчаки жилмайиб қўйди).
— Демак, тўйга оз қолди...
— Айтмайман.
— Нега?
— Чунки шахсий ҳаётим ҳақидаги гапларни айтавериб бир неча бора оғзим куйди. Энди бу борада жуда эҳтиёткорман.
— Тушунарли. Мазмунли суҳбат учун ташаккур. Ижодингизда омад. Шахсий ҳаётингизда эса фақатгина бахтга тўла қувончли ўзгаришлар бўлишини тилаймиз.
Алия ТУЛЕМБАЕВА суҳбатлашди
