Карина Капур Хон. Болливуднинг энг қайсар ва чўрткесар актрисаси. Ўзининг ижодий имкониятини ҳамиша юқори баҳолайди, ён-атрофдагиларга бўлган муносабатларини тўғридан-тўғри айтишни маъқул кўради.
Карина Капур 1980 йил 21 сентябрда туғилган. Бобоси Раж Капур, отаси Ранхир Капур, онаси актриса Бабита Капур. Опаси Каришма Капур 90- йилларнинг супер юлдузи бўлган. Карина карьерасини 2000 йилда бошлаган. У 2012 йил 16 октябрда актёр Саиф Али Хон билан турмуш қурди.
— Карина, иштирокингиздаги “Бажранге оға” фильмининг мувафаққиятига ишонганмидингиз?
— Бу картина яхшилик ва яхши одамлар ҳақида. Аввало Салмоннинг образга нисбатан муносабати ва ижросига тан бериш керак. Айнан шу роли учун унга миллий мукофотни беришларини чин дилдан истардим.
— Фильмда сизнинг қаҳрамонингизга у қадар катта ўрин берилмаган?
— Айтганча, Каришманинг режалари билан қизиқасизми?
— Албатта! Ҳозир у асосий вақтини фарзандларига сарфлаяпти. Чунки айни пайтда у болаларининг ёнида бўлиши шарт. Кичик ўғли энди уч ярим ёш бўлди.
— Айни пайтда опангиз ёлғиз. Унга кўпроқ ким ғамхўрлик қилади?
— Ҳеч қачон уни ёлғиз қолдирмаймиз. Фарзандларини севамиз, ўзини қадрлаймиз. Турмуш ўртоғим Саиф у билан яқин дўст. Лоло (Каришма) биздан икки уй нарида туради, тез-тез учрашиб, хабарлашиб турамиз.
— Одамлар сиз ва Саиф Али Хоннинг никоҳига шубҳа билан қарашган, ҳатто бир йилдан ортиқ бирга яшамайди, деганлар ҳам бўлганди...
—(кулиб) ... Лекин турмуш қурганимизга мана уч йил бўлди ва биз бирга яшаяпмиз. Ўртамиздаги ишончни, муҳаббатни мустаҳкамлаш ўз қўлимизда. Саиф менинг эркин ҳаётимга дахл қилмайди. У ақлли эркак. Истакларимни ҳурмат қилади, қадрлайди. Мен ҳам унинг муносабатига муносиб жавоб қайтараман. Ҳозир “Ки ва Ка” фильмининг суратга олиш жараёнлари билан бандман. Ишим ниҳоясига етгач, дўстларим билан Барселонага саёҳат қилмоқчимиз. Бу истагимдан албатта турмуш ўртоғим хабардор.
— Саифнинг фарзандлари билан муносабатларингиз қандай?
— Бировлар ўйлагандек ёмон эмас, албатта (кулиб). Муносабатларимиз мен кутганимдан ҳам яхши. Иброҳим ҳам, Сора ҳам ажойиб болалар. Улар меҳрибон, қизиқувчан. Айниқса Сора билан жуда яқинмиз. У сирларини мен билан бўлишади. Яхши тарбия учун уларнинг онаси Амрита Сингхга раҳмат айтаман.
— Ўзингиз қачон фарзанд кўришни режалаштираяпсиз?
— Ҳозир эмас! Она бўлишга ҳали руҳан тайёр эмасман. Икки йил ўтиб балки бу ҳақда жиддий ўйлаб кўрарман.
— Вақт билан ҳисоблашмайсизми?
— Аёл киши 40 ёшига қадар фарзанд кўриш имконига эга. Демак менда ҳали вақт етарли. Сўзсиз ўз болаларим бўлишини истайман. Мен ҳамиша ҳохлаганларимга эришганман. Актриса бўлишни истардим, орзуларим ушалди. Ўзим яхши кўрган одамга турмушга чиқдим, ўзимнинг уйим бор... Демак қолган ниятлар ҳам секин-аста амалга ошади, бунга ишонаман.
Кутилаётган премьералар
СОНАМ УЧУН МАХСУС ЛИБОСЛАР
“Бажранге оға” картинасидаги омадли ишитирокдан кейин Салмон Хон яна бир катта премьерага ҳозирланмоқда.
Режиссёр ва сценарист Сураж Баржатьянинг навбатдаги картинаси “Тутқич бермас Прем” оилавий мелодрамма дея эътироф этилмоқда. Кутилаётган картина қироллик оиласи ҳақида ҳикоя қилади. Салмон Хон фильмда иккита - Шаҳзода Прем ҳам жангари Вижай образларида намоён бўлади. Фильмда шунингдек, Сонам Капур, Анупам Кхер, Нил Нитин Мукеш каби киноюлдузлар иштирок этган. Сонам Капур талқинидаги қаҳрамон учун танланган миллий либослар, шунингдек, картина учун Химмеш Ришамиянинг мусиқалари ҳам алоҳида эътиборга лойиқлиги айтилмоқда. “Тутқич бермас Прем” фильмининг премьераси жорий йилнинг 12 ноябрига режалаштирилган.
“Бажирао ва Мастани” “Девдас”дек бўла олармикан?
Санжай Лила Бхансалидан яна бир шов-шувли тақдимот кутилмоқда. Фильм “Бажирао ва Мастани” деб номланади...
Дастлаб режиссёр бош қаҳрамонлар учун Карина Капур ҳамда Рани Мукержини танлаган эди. Аммо вақт ўтиб бош қаҳрамонлар учун номзодлар ўзгарди. Фильмда бош ролларни Ранвир Сингх, Дипика Падукони, Приянка Чопралар ижро этади. Экранда Бажирао – Ранвир Сингх талқинида гавдаланади. Унинг биринчи рафиқаси Кашибайни Приянка Чопра, иккинчи рафиқаси Мастанини Дипика Падукони ижро этган. Тарихий драма жанридаги ушбу фильм декабр ойининг иккинчи ярмида катта экранларга чиқиши кутилмоқда.
Эслатиб ўтамиз, режиссёрнинг “Девдас”, “Зулмат” каби картинлари дунё киносида ўзига хос нуфузга эга.
Севдо тайёрлади
