Oqoltin tumanida ko`p qavatli uylarning qurilishida 1,5 mlrd so`m byudjet mablag`lari talon-toroj qilindi. Bu haqda "darakchi.uz"ga Bosh prokuratura Matbuot xizmati ma`lum qildi.
Departamentning Oqoltin tuman bo`limi tomonidan o`tkazilgan tergovga qadar tekshiruvda aniqlanishicha, “Qishloq qurilish invest” MChJ IK Sirdaryo viloyati filiali va “S.S.” MChJ mansabdor shaxslari o`zaro til biriktirib, Oqoltin tumani “Ko`rkam diyor” massivida 1 ta ko`p qavatli uy-joyning qurilganligi haqidagi hujjatlarga haqiqatda bajarilmagan 949 mln so`mlik qurilish-ta`mirlash ishlarini qo`shib yozish orqali byudjet mablag`lari talon-toroj qilgan.
Shu kabi, “Y.N” MChJ tomonidan massivdagi 1 ta ko`p qavatli uy-joyning qurilganligi haqidagi hujjatlarga haqiqatda bajarilmagan 586 mln so`mlik qurilish-ta`mirlash ishlarini qo`shib yozish orqali byudjet mablag`lari talon-toroj qilinganligi aniqlangan.
Mazkur holatlar yuzasidan “Qishloq qurilish invest” MChJ IK Sirdaryo viloyati filiali mansabdor shaxslari va jamiyat rahbarlariga nisbatan Jinoyat kodeksining 167-moddasi 3-qismi “a” bandi bilan jinoyat ishi qo`zg`atilib, tergov harakatlari o`tkazilmoqda.
Xuddi shuningdek, Yangier shahrida ko`p qavatli uylarning qurilishidagi talon-torojliklar fosh etildi.
Ma`lum bo`lishicha, “Qishloq qurilish invest” MChJ IK Sirdaryo viloyati filiali va “S.M.” MChJ mansabdor shaxslari o`zaro til biriktirib, Xovos tumani “Xovos markazi” massivida 1 ta ko`p qavatli uy-joyning qurilganligi haqidagi hujjatlarga haqiqatda bajarilmagan 947 mln so`mlik qurilish-ta`mirlash ishlarini qo`shib yozish orqali byudjet mablag`lari talon-toroj qilgan.
Mazkur holat yuzasidan “Qishloq qurilish invest” MChJ IK Sirdaryo viloyati filiali mansabdor shaxslari va jamiyat rahbariga nisbatan Jinoyat kodeksining 167-moddasi 3-qismi “a” bandi bilan jinoyat ishi qo`zg`atilib, tergov harakatlari o`tkazilmoqda.
