Joriy yilning 27 iyun kuni Toshkent viloyati To`ytepa mahallasida yashovchi iste`molchi D.H. qattiq tish og`rig`idan xavotirga tushib, Nurafshon shahridagi “DAMIR STOMA SERVIS” MChJ xususiy klinikasiga boradi.
Suhbatning boshida shifokorga 2-guruh nogironligi va qandli diabet kasalligi borligini bildiradi. Ammo shifokor bemor bilan qo`pol muomala qila boshlaydi. Bu haqda Iste`molchilar huquqlarini himoya qilish agentligi ma`lum qildi.
Rentgen tekshiruv natijalari tayyor bo`lgach shifokor uni gigiena qoidalariga rioya qilmaganlikda ayblab, bemorni qo`pol muomala bilan davolaydi. Oxir-oqibat, bemor 260 ming so`mlik berilgan chekka to`lovni amalga oshiradi, ammo o`ziga qilingan bunday munosabatni sira qabul qila olmaydi.
D.H. shifokorning bunday xatti-harakatiga tegishli chora ko`rilishi kerak deb hisobladi va O`zbekiston Respublikasi Prezidentining ishonch telefoniga o`z murojaatini qoldirdi.
Iste`molchilar huquqlarini himoya qilish agentligiga yo`naltirilgan mazkur murojaat Agentlikning Toshkent viloyati hududiy tuzilmasi va Sog`liqni saqlash boshqarmasi tomonidan tomonidan o`rganib chiqildi.
“DAMIR STOMA SERVIS” MChJ xususiy klinikasi stomatolog shifokori haqiqatan ham mijozga nisbatan qo`pol munosabatda bo`lganligi tasdiqlandi va unga muassasaning 16.07.2020 yildagi № 06 sonli buyrug`iga binoan xayfsan e`lon qilindi.
O`zbekiston Respublikasining Konstitusiyasida har bir inson malakali tibbiy xizmatdan foydalanish huquqiga ega.(40-modda.)
