Shahrixon tumani Yangi hayot mahallasida istiqomat qiluvchi fuqaro Nodirbek Xojimatov ijtimoiy tarmoqda unga ko`p qavatli uydan berilgan xonadonni tuman hokimligi tomonidan qaytarib olingani haqida murojaat bilan chiqdi.
Ayni paytda fuqaro murojaati o`rganilib, tuman hokimligi axborot xizmati holat yuzasidan quyidagilarni ma`lum qildi.
"N.Xojimatov oilasi bilan alohida yashashi uchun uy-joy bilan ta`minlash, buning uchun Buvayda MFY hududida qurilayotgan ko`p qavatli uylardan olish bo`yicha tuman hokimi H.Dadaxonovga murojaat qilgan. Bu masala bo`yicha tuman hokimi, mazkur yangi uylarni qurayotgan “Istiqlol Hause 2020” MChJ rahbari va N.Xojimatov ishtirokida unga mazkur uylardan ajratilishi bo`yicha og`zaki kelishuv bo`lgan.
Bu uylar bitgunga qadar N.Xojimatov oilasiga Taraqqiyot MFY hududida qurilgan 117-ko`p qavatli uyning fuqaro F.Rahimovaga tegishli 24-xonadoni uning otasi roziligi bilan vaqtincha yashash uchun ijara asosida tuman uy-joy kommunal xizmat ko`rsatish bo`limi boshlig`i N.Yuldasheva, Taraqqiyot MFY raisi xabardorligida berilgan va uy kaliti topshirilgan. Bir necha kundan keyin N.Xojimatov uy egasining ishonchnomasini talab qilgan. Bu davrda xonadon sohibasi boshqa hududda bo`lgani tufayli otasi keyinchalik yozib berishini bildirgan. Biroq, uy N.Xojimatovga vaqtincha yashab turishi uchun berilganiga qaramay, 2 oy davomida bu erda umuman yashamagan. Shundan so`ng mulkdor o`z uyi kalitini qaytarib olgan.
Shundan so`ng N.Xojimatovga ijara asosida yashab turishi, ijara haqi homiylik asosida to`lanishi kafolatlangan boshqa uylar taklif etilganda, u bunga rozilik bildirmagan.
N.Xojimatovning tuman hokimiga nisbatan asossiz, tuhmatona fikrlar bildirgani tufayli ayni paytda unga nisbatan huquq-tartibot idoralari tomonidan surishtiruv ishlari boshlandi.
