“O`zbekkino” milliy agentligi Axborot xizmatining xabariga ko`ra, O`zbekistonda “koronavirus”ga bag`ishlangan hujjatli film suratga olinmoqda.
«O`zbekkino» milliy agentligi buyurtmasiga binoan “Hujjatli va xronikal filmlar kinostudiyasi” DUK tomonidan “Sinovli kunlar” nomli hujjatli film suratga olinmoqda.
Bugun dunyoda pandemiya davri hukm surmoqda! Er yuzini egallagan SOVID-19 infeksiyasi yurtimizni ham chetlab o`tmadi. Ushbu filmda respublikamizga koronavirus infeksiyasining kirib kelishi, tarqalishi va unga qarshi kurashish jarayonlarida Davlat rahbari hamda xalqning hamjihatlikdagi kurashi, milliy qahramonlarimizga aylangan shifokorlar, harbiylar, shuningdek, shunday sinovli kunlarda yordamga tayyor turgan xalq vakillari, qiyinchilik kunlarda bir-biriga muruvvat ko`rsatganlar haqida hikoya qilinadi.
Filmning suratga olish ishlari Xorazm, Buxoro, Samarqand, Sirdaryo, Andijon viloyatlari hamda Toshkent shahrida bo`lib o`tmoqda. Film rejissyori va ssenariy muallifi Doniyor Shokirov, operator Said Dalilxon Said Turg`utxonov.
– Filmdan ko`zlangan maqsad yurtdoshlarimiz boshiga tushgan shunday sinovli kunlarni sabr va bardosh, kuchli iroda, birdamlik, hamjihatlik bilan engib o`tishga qaratilgan. Va albatta, pandemiya davrida kasbiga sadoqat bilan el xizmatida yurgan ayrim soha vakillari, jumladan, shifokorlar, IIV hamda Milliy Gvardiya xodimlari, shuningdek, bemor, yordamga muhtoj kishilarga ko`mak berish ilinjida yurgan ko`ngillilarga bag`ishlanadi, – deydi rejissyor Doniyor Shokirov.
