Avval xabar berilganidek, bugun Prezident Shavkat Mirziyoev Toshkent shahrini jamoatchilik vakillari bilan birga aylandi. Dastlab Toshkent metropolitenining Yunusobod yo`nalishida bo`ldi. Davlatimiz rahbari “Bodomzor” bekatidan yangi “Turkiston” bekatigacha poezdda borib, amalga oshirilgan ishlarni ko`zdan kechirdi.
Keyin Toshkent shahrining Yunusobod tumanida amalga oshirilgan qurilish va obodonlashtirish ishlari bilan tanishdi.
So`ng bugundan ishga tushirilgan erusti halqa metrosiga keldi, poezdda yurdi.
Prezident matbuot xizmati xabar berishicha, davlat rahbari Yashnobod tumanida barpo etilayotgan uy-joylarni ham borib ko`rdi.
«Assalom, sohil» deb nomlangan 23 gektarlik bu majmuada 22 ta 9-16 qavatli uy qurilmoqda. Ularda 3236 xonadon bo`ladi.
Konstruksiyalar 9 balldan yuqori amplitudadagi seysmik chidamlilikka ega. Devorlar 3 qoplamali bo`lib, xonadonlar qishda iliq, yozda salqin bo`lishini ta`minlaydi. Har bir xonadon modul tipidagi alohida isitish qozoni bilan jihozlanadi.
Uylar ko`chib kelish uchun tayyor holatda topshiriladi. Xaridorlar talabi va imkoniyatiga qarab, ularda komfort, biznes va ekonom klassdagi sharoitlar yaratiladi.
Majmua hududida bolalar bog`chasi va maktab, sport va o`yin maydonchalari, do`konlar, kafelar, savdo markazi barpo qilinadi.
Shavkat Mirziyoev xorij tajribasi asosida qurilgan engil konstruksiyali kottejlarni ham ko`zdan kechirdi. Bu uylar arzonligi, o`n kunda bitkazilishi bilan ajralib turadi, buyurtma asosida bir necha xil shaklda qurib beriladi. Bunday kottejlar, ayniqsa, tog`li va cho`l hududlari uchun juda mos keladi.