Qirg`izistonning sobiq Prezidenti Almazbek Atamboev “qonundagi o`g`ri” Aziz Batukaev jinoiy ishi bo`yicha bayonot berdi. Bu haqda Qalampir yozmoqda.
Aytilishicha Atamboev Batukaevning ozodlikka chiqarilishi 2010 yil 7 aprelda namoyishchilarga o`q uzishda ayblangan Janish Bakievni Qirg`izistonga ekstradisiya qilish rejasining bir qismi bo`lganini ma`lum qilgan.
“2011 yildan men, Qirg`iziston Prezidenti sifatida jinoyatchi Janish Bakievni mamlakatga ekstradisiya qilish uchun barcha choralarni ko`rdim. Batukaev ishining mohiyati shundaki, 2012 yilda Milliy xavfsizlik davlat qo`mitasi (MXDQ) operasiyasi natijasida Janish Bakiev Qirg`izistonga keltirilishi kerak edi. Bu operasiyani boshqarishni uning tashabbuskori bo`lgan MXDQning o`sha vaqtdagi raisiga topshirgandim. Afsuski, xavfsizlik qo`mitasi operasiyasi muvaffaqiyatchizlikka uchradi”, degan Atamboev.
Sobiq Prezidentning ta`kidlashicha, na jinoiy ish materialida, na guvohlar ko`rsatmasida u tomonidan yo`l qo`yilgan korrupsiya holati yoki boshqa jinoiy harakat haqida birorta fakt yo`q. U shuning uchun, sud ishi yopiq tarzda ko`rilgan va barcha haqiqatlar maxfiylashtirilgan deb hisoblayapti.
“Men qonxo`r jinoyatchining Qirg`izistonga olib kelinishi va javob berishi uchun MXDQ operasiyasiga rozilik berganim ortidan 11 yilga qamalgan bo`lib qolyapman”, deydi Atamboev.
Uning arizasi 2020 yil 29 avgust sanasi bilan belgilangan.
Atamboev o`sha vaqtdagi MXDQ raisi deb katta ehtimol bilan Shamil Ataxonovni nazarda tutyapti. 2012 yilda u MXDQ raisi lavozimini egallagan. Uning ko`rsatmasi esa Atamboevga qarshi ayblov xulosasining asosini tashkil qilgan.
Ataxonov 2011 yil 5 dekabrdan 2012 yil 29 oktyabrgacha MXDQni boshqargan, keyin IIVga rahbarlik qilgan. Oradan 4 oy o`tib, 2013 yil fevralda ichki ishlar vaziri lavozimidan ozod qilingan. Negaki uning nomzodi Bosh vazir o`rinbosari lavozimiga tavsiya qilingan.
Bir yil muqaddam ijtimoiy tarmoqlarda Atamboevga qarshi ochilgan jinoiy ish parchalari tarqalgandi. Unda Ataxonovning ko`rsatmasi ham bo`lgan. U o`z ko`rsatmasida Batukaevni ozod qilish bo`yicha ba`zi ma`lumotlarni keltirgan.
O`sha hujjatlarga ko`ra, Ataxonov o`ziga bir xorijiy jurnalist aloqaga chiqqanini, u Chechenistondagi obro`li shaxslar asli chechen bo`lgan Aziz Batukaevni ozodlikka chiqishini istayotganini, evaziga qochoq Janish Bakievni Qirg`izistonga topshirishini aytgan. Ataxonov Atamboev bilan uchrashgan va ushbu operasiyani o`tkazishga rozilik olgan.
Jinoyat olamida “qonundagi o`g`ri” unvonini olgan Aziz Batukaev 2006 yil 3 avgustda sud qarori bilan 16 yil 8 oyga qamalgandi. U jazoni qattiq tartibli koloniyada o`tashi va uning mol-mulki musodara qilinishi belgilangan. Batukaev 2005 yil Moldovanovka qishlog`idagi axloq tuzatish koloniyasidagi tratibsizliklar vaqtida Jo`qorg`i Kenesh deputati Tinichbek Akmatboev, Jazoni o`tash bosh boshqarmasi boshlig`i Ikmatulla Po`latov va parlamentning ikki xodimini o`ldirishga aloqadorlikda ayblangan.
Batukaev jazoni Norindagi 4-sonli qamoqxonada o`tayotgan bo`lgan. 2013 yil bahorda u tibbiy asos bilan ozodlikka chiqarilgan. Unga saraton tashxisi qo`yilgan. U ozod qilingan kuni Qirg`izistonni tark etgan.
Keyinroq Batukaevning tibbiy ma`lumotnomasi soxta ekani ma`lum bo`lgan. U o`ziga tayinlangan jazoning yarmini o`tab bo`lgandi.
Oradan bir necha yil o`tib esa, Qirg`izistonning sobiq Prezidenti Almazbek Atamboev shu ish ortidan 11 yil va ikki oyga qamaldi.
