Aleksandr Lukashenko 23 sentyabr kuni kutilmaganda prezidentlik qasamyodini qildi. Bu marosim oldindan e`lon qilinmagandi. Shundan keyin minglab beloruslar bunga qarshi bo`lib o`tgan namoyishlarda qatnashishdi. Polisiya ommani tarqatib yuborish uchun suv zambaraklaridan foydalandi va bir qancha namoyishchilarni hibsga oldi.
Belorussiyani 26 yildan beri boshqarib kelayotgan Lukashenko chorshanba kuni o`zining oltinchi prezidentlik muddatiga rasman kirishdi. Bu mamlakatda 9 avgust kuni saylov o`tkazilgan va unda Lukashenkoning g`alabasi e`lon qilingandi. Lekin, Lukashenkoning muxoliflari va ba`zi chet mamlakatlar mazkur saylovda g`irromlik ishlatilganini da`vo qilishgan. Belorussiyada olti haftdan beri namoyishlar davom etmoqda.
“Uning yashirincha qasamyod qilishi o`zida kuchni ushlab qolishga urinishdir” deydi Lukashenkoning asosiy muxolifi Svetlana Tixanovskaya.
Chorshanba kuni bo`lib o`tgan namoyishlarda minglab odamlar qo`llarida muxolifat belgisi bo`lgan qizil va oq rangli bayroqni ko`tarib, Minsk ko`chalarida yurish qilishdi. Namoyishchilardan birining qo`lida “Agar 80 foiz ovoz olgan bo`lsang, nega bizdan qo`rqyapsan” deb yozilgan plakat bor edi. Namoyishchilar inson zanjirlarini hosil qilib, ko`chalarni to`sib qo`yishdi.
Yana bir muxolif Pavel Latushko Lukashenkoning yashirincha qasamyod qilishi “o`g`rilarning sirli uchrashuvi” ga o`xshashini aytdi.
“Qasamyod qilish marosimida nega fuqarolar qatnashmadi? Diplomatik korpus vakillari qani? Lukashenkoning OMONchilar va juda oz sonli yolg`onchi amaldorlarning prezidenti ekani ochiq-oydin ko`rinib turibdi” deydi Latushko.
