Bu mashqlar qaysi kasalliklarda mumkin va qanday hollarda ularni bajarish mumkin emas?
Ushbu savolga AOKAda o`tkazilgan brifingda ishtirok etgan Koronavirusga qarshi kurash shtabi a`zosi Barno Abdusamatova quyidagicha javob berdi:
- Nafas gimnastikasi nafas tizimining (bronx, o`pka) barcha kasalliklarida tavsiya etiladi.
Faqat mashqlar majmuasi va davomiyligi tashxisga qarab o`zgaradi. Shuningdek ushbu mashqlar bemor ko`p vaqtini to`shakda davolanib o`tkazadigan barcha kasalliklarida ham ishlatilishi kerak. U miasteniya (mushaklar kuchsizligi), doimo yotoqda bo`lish sababli mushak kuchining kamayishi bilan og`rigan barcha bemorlar uchun foydalidir.
Ushbu gimnastika turi bemorning tana harorati 38° darajadan yuqori bo`lganda, yuqori qon bosimida va yurak tez urishi davrida hamda organizm och holatida va darhol ovqatdan so`ng ham o`tkazilishi tavsiya etilmaydi.
Ushbu mashg`ulotlar davrida nafas qisilishi, bosh aylanishi, kuchli holsizlik, ko`ngil aynishi, saturasiyaning pasayishi holatlari kuzatilsa, u holda mashqlarni darhol to`xtatish zarur.
Mashg`ulotlarni organizmga zo`riqish berib bajarish mumkin emas. Agar bu holat har safar takrorlansa, mashqlar majmuasi yuklamasini engillashtirish tavsiya etiladi.
Gimnastika bilan kuniga 3-4 marta shug`ullanish kerak. Davomiyligi bemorning mashqlarni ko`tara olish xolatiga bog`liq. Sekin-sekin davomiylik va mashqlar yuklamasi ortib boraveradi, - dedi Barno Abdusamatova.
