“O`zbekiston Respublikasi hech bir davlatni o`zining dushmani deb hisoblamaydi va barcha mamlakatlar bilan munosabatlarni mamlakat milliy manfaatlarining ustuvorligi asosida hamda xalqaro huquqning umum e`tirof etilgan prinsiplari va normalarini inobatga olgan holda, o`zaro naf ko`rish, teng huquqlilik hamda boshqa davlatlarning ichki ishlariga aralashmaslik, barcha nizoli masalalarni tinch vositalar va muzokaralar yo`li bilan hal qilish, davlatlararo shakllangan chegaralarning buzilmasligi va o`zgarmasligini tan olish asosida quradi”.
O`zbekiston Respublikasining Mudofaa doktrinasi
Darvoqe, bugun globallashuv davom etayotgan bir davrda milliy xavfsizlikni ta`minlash, chegaralarimiz sarhadlarini mustahkam himoya qilish, mamlakat tinchligi va xalqimiz osoyishtaligini ko`z qorachig`idek asrash – Qurolli Kuchlar kuch tuzilmalari o`rtasida uzviy hamkorlikni ta`minlash hamda zarur hollarda birgalikda harakat qilishni taqozo etadi.
Nukus shahrida Shimoli-g`arbiy harbiy okrug qo`shinlari qo`mondonligi boshchiligida Qoraqalpog`iston Respublikasi va Xorazm viloyatining kuch tuzilmalari ishtirokida o`zaro hamkorlik masalalariga bag`ishlangan o`quv-uslubiy yig`in o`tkazildi.
Yig`inda O`zbekiston Respublikasi Mudofaa vazirligi Shimoli-g`arbiy harbiy okrug harbiy qism va muassasalar, Qoraqalpog`iston Respublikasi va Xorazm viloyati Ichki ishlar vazirligi hamda boshqarmasi, Davlat xavfsizlik xizmati va Chegara qo`shinlari, Milliy gvardiya, Favqulodda vaziyatlar hamda Bojxona xizmati mas`ul ofiserlari ishtirok etdi.
O`quv-uslubiy yig`in davomida Qoraqalpog`iston Respublikasi va Xorazm viloyati hududiy yaxlitligini ta`minlash, davlat chegara sarhadlarini kuchaytirish davomida xizmat o`tashning o`ziga xosligi, turli vaziyatlarda o`zaro aloqa almashinuvi, boshqaruv va hamkorlikni ta`minlash bo`yicha ma`ruzalar tinglandi. Tadbirda Shimoli-g`arbiy harbiy okrug qo`shinlari qo`mondoni polkovnik Farhodjon Shermatov ishtirok etdi.
Mashg`ulot davomida Shimoli-g`arbiy harbiy okrug javobgarlik hududida vujudga kelishi mumkin bo`lgan har qanday vaziyatda harbiy okrug boshqaruv organlari, harbiy qism va bo`linmalari, shuningdek Qoraqalpog`iston Respublikasi va Xorazm viloyati kuch tuzilmalari o`rtasida hamkorlikni tashkillashtirish bo`yicha yana bir karra aniqliklar kiritilib, har tomonlama hamkorlik masalalariga e`tibor qaratildi. Barcha Qurolli Kuchlar tuzilmalari vakillarining mavzu yuzasidan ma`ruzalari tinglandi.
O`quv-uslubiy yig`inning ikkinchi qismida harbiy okrug va hamkorlikdagi kuch tuzilmalari bilan boshqaruvni tashkillashtirish va bo`linmalarning chegara hududlarini kuchaytirish bo`yicha harakatlari, shuningdek boshqaruvni ta`minlash bo`yicha qo`llaniladigan zamonaviy aloqa vositalari va majmualar ko`rgazmali tarzda namoyish etildi. Shundan so`ng ishtirokchilar Shimoli-g`arbiy harbiy okrug qo`shinlari qo`mondonligi tomonidan qo`shinlar boshqaruvi va nazorati amalga oshiriladigan boshqaruv punkti faoliyati bilan yaqindan tanishishdi.
Tadbir yakunida harbiy okrug qo`shinlari qo`mondonligi tomonidan ishtirokchilarga tashakkurnomalar bildirildi.
Shimoli-g`arbiy harbiy okrug matbuot xizmati
