Ijtimoiy tarmoqlarida ichki ishlar xodimi fuqaroning og`zidan giyohvand vositasiga o`xshagan modda olganligi aks etgan video tarqаldi.
Holat yuzasidan IIV huzuridagi Tergov departamenti ma`lumot berdi.
Aniqlanishicha, joriy yilning 26 oktyabr kuni soat 15:00 da Qo`shrabot tumani, “Orom” to`yxonasi qarshisida haydovchi 20 yoshli R.T., boshqaruvida bo`lgan “Labo” rusumli avtomashinani qarama-qarshi yo`nalishga o`tib boshqarishi oqibatida qarama-qarshi yo`nalishdan unga qarab harakatlanayotgan 16 yoshli S.S.,ning boshqaruvida bo`lgan “Vaz-2101” rusumli avtomashina bilan to`qnashuv sodir qilgan.
YTH natijasida hech bir kishi tan jarohati olmagan, avtomashinalar shikastlangan.
Hodisa sodir bo`lgan joyga etib borishgan IIB YXHB inspektorlarini ko`rib haydovchi R.T., og`iz bo`shlig`iga noma`lum modda solib, uni yutishga harakat qilgan vaqtida, jamoatchilik kuchi yordamida uning og`zidan 1000 so`mlik kupyuraga o`ralgan, “Spichki” yozuvi bor gugurt quti ichiga solingan, quruq holdagi, maydalangan, o`tkir hidli giyohvandlik vositasiga o`xshash modda olingan. Hamda cho`ntagida giyohvand modda iste`moli uchun moslashtirilgan, angishvona o`rnatilgan baklashka qopqog`i borligi aniqlanib, haydovchi R.T., tuman IIB ma`muriy binosiga olib kelinib, tegishli tartibda hujjatlar rasmiylashtirilgan.
Sudga oid kimyoviy ekspertiza xulosasiga ko`ra, R.T.,dan ashyoviy dalil tariqasida olingan bir dona “spichki” yozuvli gugurt qutichasiga solingan yashil rangli, o`tkir hidli, quritilgan holdagi o`simlik moddasi tarkibida giyohvand vositasi tarkibida giyohvand modda tetragidrokannabinol mavjudligi, bu modda “marixuana” giyohvandlik vositasi turiga kirishligi, sof og`irligi 0,47 grammga teng ekanligi, bir dona ko`k rangli elim qopqoq ichidan giyohvand modda-tetragidrokannabinol modda izlari topilganligi bayon qilingan.
Hozirda mazkur holat bo`yicha Qo`shrabot tumani IIB huzuridagi Tergov bo`linmasi tomonidan tergovga qadar tekshiruv harakatlari olib borilmoqda.
