Los Anjeleslik so`qqabosh erkak ko`p yillardan beri o`lim to`shagida yotgan bolalarni asrab oladi. U kasal bolalarga vafot etgunlaricha kerakli bo`lgan barcha mehrni beradi va ularga g`amxo`rlik qiladi deya yozmoqda tarjumon.uz. Ba`zan biz yashab turgan bu dunyo qanchalik yovuz va bemehr tuyulmasin, jahonning qaysidir burchagida yashayotgan qahramonlar haqidagi hikoyalar bizning insoniylikka bo`lgan umidlarimizni qayta uyg`otadi. O`zining hayotini o`ta og`ir kasalliklarga chalingan bolalarni parvarish qilishga bag`ishlagan erkak haqidagi hikoya esa sizning yuragingizni chilparchin qiladi. Los Anjelesda yashovchi 65 yoshli Muhammad Bazek o`lim to`shagida yotgan va hech kimi yo`q bolalarni asrab oladi xamda ularga bu foniy dunyodan o`tgunlaricha g`amxo`rlik qiladi.  Asli liviyalik bo`lgan Muhammad Bazek AQShga 40 yil avval kelgan va 1997 yilda AQSh fuqaroligini olgan. Muhammad shu paytgacha 80 nafar bolani asrab olgan va ulardan 10 nafari uning qo`lida jon bergan. U ushbu fidokorona ishlarini davom ettirishga va`da berar ekan bolalar jon berganidan keyin paydo bo`lgan g`am-tashvishdan o`zini ovutish yo`lini topadi. “1995 yilda biz (Muhammad va uning o`sha paytda tirik bo`lgan xotini) kasalxonada qolib ketgan etimlar va shafqatsizlik sababli davlat tomonidan oilalaridan olib qo`yilgan bolalarni asrab olishga qaror qildik. Los Anjelesda o`lim arafasida turgan bolalarni asrab oluvchi yagona uy bu mening uyim. Men 1989 yildan beri 80 nafar bolani asrab oldim va ularning o`n nafari qo`llarimda jon berdi” deydi Muhammad.  Ma`lum qilinishicha, Los Anjelesdagi kasalxonada hech kimi yo`q va og`ir ahvoldagi biror bir bola paydo bo`lib qolsa, kasalxona ma`murlari ushbu qahramonimizga telefon qilishadi. U har doim ko`makka muhtoj bolalarni uyiga olib kelishga tayyor. O`zi bu haqda shunday deydi: “Kasalxonadagilar men bolalarni asrab olishni rad etmasligimni bilishadi. Agar men bu ishni qilmasam, ular boshqa kasalxonaga jo`natiladi. Ularnig oilasi hamda uyi yo`q. Men bunday bolalarni uyimga olib kelsam ular oila muhitini his qilishadi. Bu erda vafot etgunlaricha ularga mehr va parvarish beriladi”. 20 yildan ko`proq muddatdan beri bola asrab olayotgan ushbu qahramon o`zining uyidagi bolalarga yaxshi va xavfsiz muhit yaratib beradi. Muhammad asralgan bolalar bilan birga o`zining o`g`lini ham parvarish qiladi. Uning o`g`li ham ikkita tug`ma kasallik bilan dunyoga kelgan. 2017 yilda Muhammad Bazek rak kasalligi bilan tashxislandi. O`sha paytda uning o`zi ham juda qo`rqqandi. “O`sha paytda mening yonimda oilam yo`q edi va juda qo`rqqandim. Hech kimsiz qolgan bolalar nimani his qilsalar, men ham shunday tuyg`ularni boshimdan o`tkazdim. Ular yolg`iz. Men 62 yoshdaman va shunga qaramay juda qo`rqqanman. Endi yolg`iz qolgan bolalar nimani tuyushlarini bir o`ylab ko`ringchi” deya 2017 yildagi voqealarni esga oladi Muhammad. Margaret Kots ismli ayol mazkur fidoyi insonning olib borayotgan faoliyatini qo`llab-quvvatlash maqsadida xayriya aksiyasini boshlagandi. 100 ming dollar yig`ishni maqsad qilgan ushbu xayriyaga hozirgacha 70 ming dollar yig`ilgan. Ushbu xayriyaga butun dunyodagi odamlar hissa qo`shishgan. “Muhimi shundaki, siz ularni xuddi o`zingizning bolalaringizdek sevishingiz shart” deya Muhammad Bazekning so`zlarini keltiradi Margaret Kots. |
