Kecha 5 noyabr kuni Buyuk Britaniyada O`zbekistonning ushbu mamlakatdagi turizm brendi elchisi Sofi Ibbotson tashabbusi bilan tashkil etilgan Britaniya jamoatchiligini O`zbekiston va boshqa Markaziy Osiyo mamlakatlarining gastronomiyasi hamda qandolatchilik mahsulotlari bilan yaqindan tanishtirishga bag`ishlangan yangi formatdagi televizion shouga start berildi.
Shuningdek, Britaniyaning "Great British Bake Off" teleshousi doirasida “The Great Central Asian Bake Off” onlayn oshpazlik tanlovi ham tashkil etiladi. Oshpazlik tanlovida ishtirokchilar har hafta dunyoning istalgan nuqtasidan turib, uy sharoitida maxsus reseptlar yordamida tayyorlanuvchi pishiriqlar va shirinliklarni tayyorlash jarayonlariga bepul qo`shilishlari mumkin. Tanlov ishtirokchilari teleshouda ko`rsatilgan pishiriqni o`zlari uy sharoitida tayyorlashlari, so`ngra esa surat va videolarini Tvitter va Instagramda #GCABO xeshtegi yordamida barcha bilan bo`lishishlari kerak.
Tanlov hakami - sayohatlar va kulinariya yo`nalishida yozuvchi, «Samarqand» va "Qizil qumlar" kitoblarining muallifi hamda mamlakatimizdagi "Oltin qalam" mukofoti laureati Karolin Eden. Kerolin har haftada “haftaning yulduzli oshpazi”ni tanlab boradi, yakuniy bosqichida esa g`olibni aniqlab beradi. Tanlov g`olibiga mashhur yozuvchining Markaziy Osiyo bo`ylab to`plagan noyob taomlar reseptlari va hikoyalar hamda qiziqarli suratlar to`plamini o`z ichiga olgan yangi "Qizil qumlar" nomli kitobi muallif dastxati bilan birga topshiriladi. Resept to`rt hafta davomida, har payshanba kuni Karolin Edenning yangi asari bo`lmish - "Qizil qumlar" kitobidan bittadan e`lon qilinadi.
Har payshanba kuni bittadan tanlov e`lon qilinadi, resept maslahatlar esa hafta davomida O`zbekistonning Buyuk Britaniyadagi turizm brendi elchisi Sofi Ibbotsonning Tvitter va Instagram`dagi @uzambassador sahifalarida berib boriladi. The Great British Bake Off (Bake Off yoki GBBO) - bu “Love Productions” tomonidan tashkil etilgan televizion tanlov bo`lib, unda bir guruh havaskor oshpazlar bir necha turda o`zaro raqobatlashib, hakamlar hay`atini hayratga solishga harakat qilishadi. Har bir turda bittadan raqib chetlashtiriladi va g`olib finalga chiqqan raqiblar orasidan tanlanadi.
Ma`lumot uchun, ko`rsatuvning birinchi qismi 2010 yilning 17 avgust kunida efirga uzatilgan. BBC ma`muriyatining rejasiga ko`ra, ko`rsatuvning birinchi to`rtta soni “BBC Two” kanalida berilgan, lekin ko`rsatuvning tomoshabinlar tomonidan ijobiy kutib olinishi va ommalashib ketishidan kelib chiqib, kanal ma`muriyati keyingi uch qismni “BBC One” telekanaliga ko`chirishiga to`g`ri keldi. Ettinchi qismdan so`ng “Love Productions” bilan “Channel 4” ma`muriyati o`rtasida teledasturning qolgan qismlarini yaratish maqsadida uch yillik shartnoma imzolanadi. Pandemiya munosabati bilan hozirda tanlov onlayn rejimda o`tkazilmoqda.
