Кеча 5 ноябрь куни Буюк Британияда Ўзбекистоннинг ушбу мамлакатдаги туризм бренди элчиси Софи Ибботсон ташаббуси билан ташкил этилган Британия жамоатчилигини Ўзбекистон ва бошқа Марказий Осиё мамлакатларининг гастрономияси ҳамда қандолатчилик маҳсулотлари билан яқиндан таништиришга бағишланган янги форматдаги телевизион шоуга старт берилди.
Шунингдек, Британиянинг "Great British Bake Off" телешоуси доирасида “The Great Central Asian Bake Off” онлайн ошпазлик танлови ҳам ташкил этилади. Ошпазлик танловида иштирокчилар ҳар ҳафта дунёнинг исталган нуқтасидан туриб, уй шароитида махсус рецептлар ёрдамида тайёрланувчи пишириқлар ва ширинликларни тайёрлаш жараёнларига бепул қўшилишлари мумкин. Танлов иштирокчилари телешоуда кўрсатилган пишириқни ўзлари уй шароитида тайёрлашлари, сўнгра эса сурат ва видеоларини Твиттер ва Инстаграмда #GCABO хештеги ёрдамида барча билан бўлишишлари керак.
Танлов ҳаками - саёҳатлар ва кулинария йўналишида ёзувчи, «Самарқанд» ва "Қизил қумлар" китобларининг муаллифи ҳамда мамлакатимиздаги "Олтин қалам" мукофоти лауреати Каролин Эден. Керолин ҳар ҳафтада “ҳафтанинг юлдузли ошпази”ни танлаб боради, якуний босқичида эса ғолибни аниқлаб беради. Танлов ғолибига машҳур ёзувчининг Марказий Осиё бўйлаб тўплаган ноёб таомлар рецептлари ва ҳикоялар ҳамда қизиқарли суратлар тўпламини ўз ичига олган янги "Қизил қумлар" номли китоби муаллиф дастхати билан бирга топширилади. Рецепт тўрт ҳафта давомида, ҳар пайшанба куни Каролин Эденнинг янги асари бўлмиш - "Қизил қумлар" китобидан биттадан эълон қилинади.
Ҳар пайшанба куни биттадан танлов эълон қилинади, рецепт маслаҳатлар эса ҳафта давомида Ўзбекистоннинг Буюк Британиядаги туризм бренди элчиси Софи Ибботсоннинг Твиттер ва Инстаграмъдаги @узамбассадор саҳифаларида бериб борилади. The Great British Bake Off (Bake Off ёки GBBO) - бу “Love Productions” томонидан ташкил этилган телевизион танлов бўлиб, унда бир гуруҳ ҳаваскор ошпазлар бир неча турда ўзаро рақобатлашиб, ҳакамлар ҳайъатини ҳайратга солишга ҳаракат қилишади. Ҳар бир турда биттадан рақиб четлаштирилади ва ғолиб финалга чиққан рақиблар орасидан танланади.
Маълумот учун, кўрсатувнинг биринчи қисми 2010 йилнинг 17 август кунида эфирга узатилган. BBC маъмуриятининг режасига кўра, кўрсатувнинг биринчи тўртта сони “BBC Two” каналида берилган, лекин кўрсатувнинг томошабинлар томонидан ижобий кутиб олиниши ва оммалашиб кетишидан келиб чиқиб, канал маъмурияти кейинги уч қисмни “BBC One” телеканалига кўчиришига тўғри келди. Еттинчи қисмдан сўнг “Love Productions” билан “Channel 4” маъмурияти ўртасида теледастурнинг қолган қисмларини яратиш мақсадида уч йиллик шартнома имзоланади. Пандемия муносабати билан ҳозирда танлов онлайн режимда ўтказилмоқда.
