Farg`ona viloyati. Joriy yilning 10 noyabr kuni soat 04:08 da 31 yoshli N.S. ismli ayol Shifokor mahallasi hududidagi “Shifobaxsh Chimyon” nomli dorixona tomon harakatlanib ketayotgan vaqtida, yonidan noma`lum shaxs velosiped boshqarib chamasi 30 metr masofa o`tganidan so`ng, velosipedini tashlab, uning qarshisiga harakatlanib kelib zo`rlik ishlatib, qo`lida bo`lgan narxi 200.000 so`mlik “Lenovo” rusumli uyali telefon apparatini ochiqdan-ochiq talon-toroj qilib, velosipedi bilan hodisa joyidan yashiringan. Bu haqda Farg`ona viloyati IIB Axborot xizmati xabar berdi.
Mazkur holat yuzasidan noma`lum shaxsga nisbatan 10.11.2020 yilda Farg`ona tumani IIB huzuridagi Tergov bo`limi tomonidan O`zbekiston Respublikasi Jinoyat kodeksining 166-moddasi 2-qismi “a” bandi (hayot va sog`liq uchun xavfli bo`lmagan zo`rlik ishlatib yoxud shunday zo`rlik ishlatish bilan qo`rqitib sodir qilingan talonchilik ) bilan jinoyat ishi qo`zg`atilgan.
Ushbu jinoyatni issiq izidan ochish maqsadida bir qator tergov-tezkor harakatlari olib borilishi natijasida jinoyatni muqaddam bir necha marotaba bosqinchilik va o`g`irlik jinoyatlari sodir etgan Konchilar mahallasida istiqomat qiluvchi 31 yoshli Sh.M. ekanligi aniqlangan hamda tergovga qadar tekshiruv vaqtida Sh.M. turmush o`rtog`iga yuqoridagi talonchilik yo`li bilan egallab olingan uyali telefon apparatini ish xonasiga yashirib qo`yganligini va uni zudlik bilan yo`qotish kerakligini aytgan bo`lsa-da, biroq ayol fuqarolik burchini anglagan holda ushbu haqda ichki ishlar idorasi xodimlariga ma`lum qilgan. Natijada ashyoviy dalil tariqasida rasmiylashtirib olingan uyali telefon apparati Sh.M.,ning xizmat xonasida bo`lgan supurgilar orasidan topilgan.
Tergov harakatlari jarayonida Sh.M.,ga nisbatan O`zbekiston Respublikasi JKning 166-moddasi 2-qismi “a” bandi bilan ayblov e`lon qilinib, “qamoqqa olish” tarzidagi ehtiyot chorasi qo`llanilgan.
Farg`ona viloyat Ichki ishlar boshqarmasi yuqoridagi ko`rsatilgan jinoyatni sodir etgan shaxs o`n yilgacha ozodlikdan mahrum qilish bilan jazolanishi mumkinligi haqida eslatib o`tadi.
