Xozirda Qashqadaryo viloyati Qarshi shahridagi yangi bunyod etilgan "Korxonalarni sog`lomlashtirish va xususiylashtirish klinikasi" binosida Xalqaro press-klub sessiyasi bo`lib o`tmoqda. "Qashqadaryo viloyati: Dolzarb muammolar va innovasion echimlar" mavzusi doirasida bo`lib o`tayotgan sessiyada viloyat mutasaddilari ishtirok etishyapti. Bu haqda "Darakchi" muxbiri xabar bermoqda.
"Bu - yirik tabiiy monopoliya"
12-13 noyabr kunlari Prezident Shavkat Mirziyoevning viloyatga tashrifi chog`ida Qashqadaryo o`z salohiyatiga yarasha faoliyat yuritmayotganini ta`kidlagan edi. Bu masala bo`yicha Qashqadaryo viloyati hokimi Zoir Toirov o`z munosabatini bildirdi:
"Viloyatning bu ahvolga tushib qolishining ob`ektiv va sub`ektiv sabablari bor. Qashqadaryo viloyatida yirik sanoat korxonalari bor. Alohida bir sanoat korxonasiga bog`lanib qolish pandemiya sharoitida naqadar og`ir oqibatlarga olib kelishini ko`rsatdi. Kimdir neftga, kimdir gazga bog`lanib qolishi noto`g`ri. Bu - yirik tabiiy monopoliya.
Bundan tashqari, Qashqadaryo viloyatida go`sht va sut mahsulotlarini qayta ishlash ko`rsatkichlari atigi 6-8 % ni tashkil etadi. Go`sht mahsulotlarining 41 foizini respublikaga etkazib beradi. Lekin uni qonuniylashtirish aksariyat hollarda yo`lga qo`yilmagan.
Tannarxni tushirib yuboradigan omil - bu mavsumiylik. Narx-navoni saqlab qolish uchun logistika, ya`ni mahsulotlarni yil davomida saqlash uchun etarli sharoitimiz yo`q. Buni tan olish kerak".
