Sirdaryo viloyatida sog`liqni saqlash tizimini tashkil etishning yangi modeli va davlat tibbiy sug`urtasi mexanizmlarini joriy etish bo`yicha tajriba-sinov loyihasi amalga oshiriladi. Bu Prezidentning tegishli qarorida belgilandi.
Ushbu tajriba-sinov loyihasi doirasida:
- birlamchi tibbiy-sanitariya yordami muassasalarida oilaviy shifokor, uning o`rta tibbiyot xodimlaridan iborat terapiya va pediatriya yo`nalishlari bo`yicha yordamchilari, patronaj hamshiralari va doyadan tashkil topgan guruhlar tuziladi;
- har bir tibbiyot muassasasi darajasida davlat tomonidan kafolatlangan bepul tibbiy xizmatlar va dori vositalari paketi (keyingi o`rinlarda – kafolatlangan paket) ishlab chiqiladi;
- kafolatlangan paket birlamchi tibbiy-sanitariya yordami muassasalari va shifoxonalarda O`zbekiston fuqarolari, O`zbekistonda doimiy yashovchi chet el fuqarolari va fuqaroligi bo`lmagan shaxslarga taqdim etiladi. Kafolatlangan paketga kiritilmagan tibbiy xizmatlar pullik asosda ko`rsatiladi;
- sog`lig`i bilan bog`liq ko`rsatkichlarini monitoring qilish, ularni tibbiyot muassasasiga biriktirish, kasallik tarixini yuritish, dori vositalari uchun resept yozish va kafolatlangan paketga muvofiq tibbiyot muassasalariga yo`naltirish yagona elektron platforma orqali amalga oshiriladi;
- birlamchi tibbiy-sanitariya yordami muassasalari tibbiyot xodimlarining eng muhim samaradorlik ko`rsatkichlari (KPI) ishlab chiqilib, unga erishilganligi monitoring qilinadi hamda natijalariga qarab qo`shimcha rag`batlantirish to`lovlari to`lanadi;
- kafolatlangan paket asosida aholining barcha qatlamlariga sifatli va to`liq tibbiy yordam ko`rsatilishini moliyalashtirishga qaratilgan davlat tibbiy sug`urtasi mexanizmlari bosqichma-bosqich joriy etiladi.
2020 yil 1 dekabrdan Davlat tibbiy sug`urtasi jamg`armasi tashkil etiladi.
Guliston tibbiyot kolleji negizida tibbiyot oliy ta`lim muassasasini tashkil etish uchun xususiy sektor jalb qilinadi.
