Xorazm viloyatida noqonuniy tender bilan bog`liq holat qayd etilgan va uning natijalari tahlil qilinib, nohalol deb topilganligi isbotlangan. Bu haqda Monopoliyaga qarshi kurashish qo`mitasi Matbuot xizmati xabar bermoqda.
Xususan «Projects Design Style» MChJ tenderdagi shubhali natijalar yuzasidan Monopoliyaga qarshi kurashish qo`mitasining Xorazm viloyat hududiy boshqarmasiga yordam so`rab murojaat etdi.
Ma`lum bo`lishicha, joriy yilning 12 avgust sanasida “Ichan-Qa`la” Davlat muzey qo`riqxonasi tomonidan maxsus axborot portalida “Muhammad amin Inoq” madrasasida Xorazm Ma`mun akademiyasi tarixini yorituvchi “Majlis Ulamo” doimiy zamonaviy muzey ekspozisiyasini shakllantirish ishlarini bajarish bo`yicha tanlov e`lon qiladi. Mazkur ishning boshlang`ich narxi – 1 144 647 500 so`mni tashkil etadi.
Mazkur tanlovlarga uchta ishtirokchi o`z nomzodini qo`yib, barcha hujjatlarni topshirgan. “Loona” – 1 105 775 000 so`m, “Projects Design Style” – 1 023 556 500 so`m va “Ziynat dizayn” – 1 075 138 000 so`m narxlar bilan o`z takliflarini bergan.
22 avgust kuni “Ichan-Qa`la” g`olibni e`lon qiladi. Unga ko`ra, “Ziynat dizayn” g`olib deb topiladi, lekin, takliflar ichida eng arzon narxni ko`rsatgan boshqa ishtirokchida savol tug`iladi, qanday qilib, yuqori narx taklif etgan xo`jalik yurituvchi tenderda g`olib bo`lishi mumkin.
Buyurtmachi esa, o`z navbatida tanlov qilishda narxga emas, ish sifatiga qaralganini ta`kidlaydi.
Bu bilan “Projects Design Style” ning shubhalari to`xtamaydi, chunki bu tadbirkorning haq-huquqlari kamsitilishining yaqqol misoli edi.
Do`stlar, bunday qilish yaramaydi. Axir bu qonunning buzilishiku!
Buyurtmachi esa, o`z fikrida turib olib, ikki kundan so`ng, g`olib nomini e`lon qilgan e`lonini yangidan tahrir qilib, norozilik bildirayotgan ishtirokchini tenderdan chiqazib tashlanganini, bunga sabab esa ishtirokchi uchun zarur hujjatlar to`liq topshirilmaganini aytadi.
Haq-huquqlari ikki marotaba kamsitilgan tadbirkor, Monopoliyaga qarshi kurashish qo`mitasi Xorazm viloyat hududiy boshqarmasiga murojaat etadi.
Maxsus komissiya mutaxassislari tomonidan olib borilgan o`rganishlar natijasida, O`zbekiston Respublikasi “Raqobat to`g`risida”gi qonunning 14 moddasi, 1-xatboshi talablari buzilganligi alomatlari aniqlanadi. Ya`ni, “Ichan-Qal`a” Davlat muzey qo`riqxonasi tender ishtirokchilariga to`liq talablarni ko`rsatmagan bo`lib chiqadi.
Bu esa, ishtirokchi noto`g`ri chetlatilganini anglatadi. Shundan so`ng, Maxsus komissiya mazkur holat bo`yicha ish qo`zg`atadi va o`rnatilgan tartibda ko`rsatma beradi.
Bundan tashqari, “Raqobat to`g`risida”gi qonunning 2 moddasiga ko`ra, tenderni noqonuniy deb topib, imzolangan shartnomani bekor qiladi. Bu esa, o`z navbatida ma`muriy huquqbuzarlik hisoblanib, o`rganishlar natijasida aniqlangan ma`lumotlar va hujjatlar sudga topshiriladi.
"Hurmatli tadbirkorlar, agar siz ham shunga o`xshash holatga duch kelayotgan bo`lsangiz, Monopoliyaga qarshi kurashish qo`mitasiga murojaat eting", deyiladi qo`mita axborotida.
