Ijtimoiy tamroqlar va OAVda Yangibozor tumani xalq ta`limi bo`limi xatida 40 dan ortiq xato topilganligi haqida xabar va mazkur xat surati keng muhokama etilmoqda.
Xorazm viloyati xalq ta`limi boshqarmasi tomonidan holat o`rganilgani ma`lum qilindi.
Tezkor surishtiruv natijasida 2020 yil 10 noyabr kuni Yangibozor tumani xalq ta`limi bo`limiga tegishli 01/7-13-11-869-sonli xat tuman xalq ta`limi bo`limi amaliy fanlar metodisti O`.Shomuratov tomonidan imlo xatolarga yo`l qo`ygan holda tayyorlanib, tuman xalq ta`limi bo`limi mudiri F.Amanbaev tomonidan e`tiborsizlik bilan imzolanganligi va ijroga yo`naltirilganligi aniqlandi.
Tuman xalq ta`limi bo`limi mudiri F.Amanbaev lavozim vazifasiga sovuqqonlik bilan qaraganligi uchun ogohlantirildi va yuqoridagi holatga qayta yo`l qo`ymaslik lozimligi bo`yicha tushuntirildi.
Tuman xalq ta`limi bo`limi nafaqadagi amaliy fanlar metodisti O`.Shomuratov idora hujjatini tayyorlashda o`zbek adabiy tilining amaldagi qoidalari va normalariga amal qilmaganligi uchun tuman xalq ta`limi bo`limi tomonidan hayfsan intizomiy jazo chorasi qo`llanildi.
Xorazm viloyati xalq ta`limi boshqarmasi tomonidan barcha tuman, shahar xalq ta`limi bo`limi xodimlariga yuqoridagi kabi holatlar qayta sodir bo`lmasligi uchun o`z lavozim majburiyatlariga mas`uliyat bilan yondashishlari, hujjat yuritishda Vazirlar Mahkamasining 1995 yil 24 avgustdagi 339-sonli qarori bilan tasdiqlangan "O`zbek tilining asosiy imlo qoidalari"ga qat`iy amal qilishlari yuzasidan tushuntirish ishlari olib borildi.
Shuningdek, xatda keltirilgan "Yoshlik" jismoniy tarbiya va sport jamiyatiga a`zolik badalining yig`ilishi bo`yicha quyidagilarni ma`lum qilamiz, deyiladi xabarda.
O`zbekiston Respublikasi Vazirlar Mahkamasining 2014 yil 1 avgustdagi “O`zbekiston “Yoshlik” jismoniy tarbiya va sport jamiyati faoliyatini takomillashtirish to`g`risida”gi 210-son qaroriga hamda Ustaviga asosan jamiyatning asosiy mablag`lari a`zolarining a`zolik badallaridan tushgan mablag`lardan shakllantirilishi, ixtiyoriy ravishda o`quvchi-yoshlar uchun a`zolik badali yiliga bir marotaba eng kam oylik ish haqining ikki foizi, pedagog va boshqa xodimlar uchun a`zolik badali yiliga bir marotaba eng kam oylik ish haqining to`rt foizi miqdorida yig`ilishi belgilab qo`yilgan.
A`zolik badali yig`ilishi ixtiyoriy ravishda amalga oshiriladi va a`zolik badallaridan tushgan mablag`larning 25 foizi boshlang`ich tashkilot, 25 foizi tuman (shahar) bo`linmalari, 25 foizi mintaqaviy bo`limlar va 25 foizi jamiyatning Markaziy kengashi xarajatlarini qoplash uchun yo`naltiriladi.
Xorazm viloyat xalq ta`limi boshqarmasi axborot xizmati
