Rahbar va xodimlarning semizlik darajasi, vazn indeksini onlayn kuzatib borish tizimi yo`lga qo`yiladi(foto)

Axborot va ommaviy kommunikasiyalar agentligida Jismoniy tarbiya va sport vazirligi mutasaddilari ishtirokida matbuot anjumani bo`lib o`tdi. Unda jismoniy tarbiya va sport sohasini rivojlantirish, aholini sog`lom turmush tarziga jalb qilish borasida amalga oshirilayotgan ishlar muhokama qilindi.

Xususan, tadbirda «Sog`lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to`g`risida»gi Prezident farmonida davlat organlari va tashkilotlari rahbarlari va xodimlari, ularning oila a`zolarining ham jismoniy tarbiya va sport bilan shug`ullanishlarini ta`minlash, ular o`rtasida musobaqalar tashkil etish ko`zda tutilgani ta`kidlandi.

Respublikada aholi o`rtasida ommaviy sportni rivojlantirish va sog`lom turmush tarzini targ`ib qilishda — yurish, yugurish, mini-futbol, velosport, badminton, stritbol, «Workout» (mahalla va ko`cha fitnesi) sportning ustuvor turlari etib belgilandi.

Har chorakda har bir tuman (shahar)da «Sog`lom turmush tarzi rivojlangan mahalla» tanlovi tashkil etiladi. 2021 yilda 50 ta sport zali, 48 ta sport inshooti qurilib foydanishga topshiriladi.

2021/2022 o`quv yilidan boshlab umumiy o`quv soatlari doirasida jismoniy tarbiya fanini barcha sinflarda haftada 2 soatdan o`qitish tashkil etiladi.

Davlat organlari va tashkilotlarining ish kuni davomida ishlab chiqarish gimnastikasi mashqlari bajarishi uchun ish vaqtiga kiritiladigan maxsus tanaffuslar belgilanadi.

2021 yil 1 iyuldan boshlab, vazirlik, idora, korxona, tashkilot, mahalliy davlat hokimiyati organlarida faoliyat olib borayotgan rahbar va xodimlarning antropometrik ko`rsatkichlarini (semizlik darajasini, vazn indeksini), boshqa o`tkir kasalliklarni keskin kamaytirish, salomatlikni mustahkamlash bo`yicha baholash mezonlarini ishlab chiqib, reyting asosida tahlil qilish hamda natijalarni onlayn kuzatib borish tizimi yo`lga qo`yiladi.

2021 yil 1 sentyabrga qadar respublika hududlarida ekspedisiya tashkil qilgan holda milliy sport turlari hamda xalq o`yinlari tarixini o`rganish asosida «O`zbekiston Respublikasi milliy sport turlari va xalq o`yinlari ensiklopediyasi»ni tayyorlanadi va chop etiladi.

«Jismoniy tarbiya va sport sohasida kadrlar tayyorlash tizimini takomillashtirish va ilmiy salohiyatni oshirish chora-tadbirlari to`g`risida» 3 noyabrdagi Prezident qaroriga ko`ra, O`zbekiston davlat jismoniy tarbiya va sport universitetining Farg`ona filiali, O`zbekiston davlat jismoniy tarbiya va sport universitetining Sportchilarning texnik-taktik, psixofiziologik holatini o`rganish va tahlil qilish bo`yicha maxsus ilmiy laboratoriyasi negizida O`zbekiston davlat jismoniy tarbiya va sport universiteti huzuridagi Jismoniy tarbiya va sport ilmiy tadqiqotlar instituti tashkil etiladi.

2020 yil 1 dekabrdan boshlab Universitet respublikadagi barcha jismoniy tarbiya va sport sohasidagi davlat tashkilotlari hamda sport federasiyalari (uyushmalari) faoliyati ustidan o`quv va ilmiy-uslubiy rahbarlikni amalga oshiradi.

Universitet huzurida jamoatchilik asosida doimiy faoliyat yuritadigan Respublika ilmiy-uslubiy kengashi tashkil etiladi.

2021 yildan boshlab har yili jismoniy tarbiya va sport sohasini rivojlantirishga va sohadagi muammolarning ilmiy echimini ta`minlashga qaratilgan loyihalar tanlovlari muntazam tashkil etiladi.

2021/2022 o`quv yilidan boshlab Toshkent tibbiyot akademiyasi, Toshkent farmasevtika instituti va boshqa oliy ta`lim muassasalarida sport tibbiyoti, farmakologiyasi, reabilitologiyasi, psixologiyasi va dietologiyasi mutaxassisliklari yo`lga qo`yiladi.

2020 yilning yakuniga qadar sport-ta`lim muassasalari hamda sport turlari bo`yicha federasiyalar (uyushmalar) uchun bosma nashrlarni chop etish maqsadida Universitetda «Jismoniy tarbiya va sport» nashriyoti va bosmaxona faoliyati yo`lga qo`yiladi.