Rossiyadagi byudjet muassasalari xodimlari koronavirusga qarshi ishlab chiqilgan «Sputnik V» vaksinasi sinovida qatnashishga majbur qilingan, deb yozmoqda Reuters agentligi.
«Hamkasblar!!! Bu qanday sabotaj??? Kimni aldamoqchisizlar??? Koronavirusga qarshi vaksina – mutlaq ustuvorlik!!!» — Reuters’ning yozishicha, Moskva shahar mulk departamenti amaldori Sergey Martyanov qo`l ostidagi xodimlariga ana shu mazmunda xabar jo`natgan.
Moskva sog`liqni saqlash departamenti esa agentlikka vaksina ikkita klinik sinovdan muvaffaqiyatli o`tgani va xavfsiz ekanligini ko`rsatgani, shahar aholisi tadqiqotda ishtirok etish to`g`risidagi qarorni ixtiyoriy ravishda qabul qilayotganini bildirgan.
Reuters ma`lumotiga ko`ra, oktyabrda Moskvadagi 3-poliklinika bosh shifokori o`rinbosari Olga Svetkova qo`l ostidagi xodimlar bilan WhatsApp orqali yozishmalarida vaksinasiyadan bosh tortganlar ishdan bo`shatilishini bildirgan.
«Klinikamizdagi barcha xodimlarning COVID-19ga qarshi majburiy vaksinasiyadan o`tishlari buyurilgan. Bu Moskva sog`liqni saqlash departamenti yurituvida. Agar vaksinasiyadan bosh tortsangiz, ishdan bo`shatilishingiz mumkin. Buning uchun qonuniy baza bor», — deya uning xabaridan iqtibos keltiradi agentlik.
3 poliklinika vakili Reuters’ga bergan izohida, vaksinasiya to`g`risidagi buyruq xodimlarga g`amxo`rlik darajasidan darak berishi hamda «xodimlar vaksinasiya borasidagi qarorni ixtiyoriy va faqat tibbiy tekshiruvdan so`ng qabul qilayotgani»ni aytgan. Moskva sog`liqni saqlash departamenti «go`yoki 3-poliklinikada shifokorlarning ommaviy ishdan bo`shatilishi va vaksinasiyaga majburlanayotganligi» haqidagi xabarni rad etdi.
Reuters jurnalistlari shuningdek, oktyabr va noyabrda Moskvadagi 13 ta emlash markazida bo`lib, 32 nafar tashrif buyuruvchi bilan suhbatlashgan. Ularning 30 nafari vaksinasiya to`g`risida ish joyida aytilganini bildirgan, 23 nafari haqiqiy ko`ngilli ekanini, 9 nafari esa ko`ngilli emasligini aytgan. Agentlikning qayd etishicha, ularning barchasi davlat sektori xodimlari bo`lgan. Ularning ayrimlari ish beruvchilarning vaksina sinovida qatnashish to`g`risidagi iltimosini rad eta olishmaganini bildirgan.
«Bu erga kelishga majbur bo`ldik. Rad etishning imkoni yo`q, shunchaki mumkin emas», — degan tez yordam xizmati xodimi Reuters muxbiri bilan suhbatda. Uning so`zlariga ko`ra, ularga sinovlarda qatnashish uchun ro`yxatga yozilish shartligi aytilgan. Agentlik bilan suhbatlashgan o`qituvchilardan biri u ishlaydigan maktabga kvota ajratilgani va rahbariyat xodimlarni vaksinasiyada qatnashishga majbur qilganini aytgan.
«Ular qatnashishingiz kerakligini aytishsa, qatnashishingiz shart», — degan u.
Ko`cha tozalovchi farrosh esa ularga vaksinasiyada qatnashish shartligi, chunki ko`chada ko`pchilik bilan yuzma-yuz kelishlari aytilganligini bildirgan.
Eslatib o`tamiz, 2 dekabr kuni Rossiya prezidenti Vladimir Putin kelgusi haftadan koronavirusga qarshi «keng miqyosda»gi vaksinasiyani boshlash topshirig`ini bergan edi.
