15 dekabr kuni yoshlar ijod saroyida madaniy meros haftaligi doirasida ajoyib feshn-shou o`tkaziladi. Unda taniqli dizaynerlarning mualliflik namoyishlari bo`lib o`tishi kutilmoqda. Ularning eng yaxshilariga meros haftaligining maxsus sovg`alari topshiriladi.
Xolida KOMILOVA, O`zbekiston dizaynerlar uyushmasi raisi:
– Feshn-shou (modalar namoyishi) asosan bizning o`zbek milliy liboslarimizga bag`ishlangan, chunki milliy liboslarimizni yanada tiklagan holda zamonaviy ko`rinishda to`plamlar yaratganmiz. Bu shouda birinchi o`rinda 6 ta hududimiz bo`yicha: Samarqand, Buxoro, Xorazm, Qoraqalpog`iston, Surhondaryo-Qashqadaryo, Toshkent-Farg`ona tarixiy kastyumlarni ko`rsatamiz. Tadbirda tarixiy matolar va milliy dizaynda tayyorlangan to`plamlar bo`ladi va bu bizga yangi liboslarni yaratishda asosiy manba bo`lib xizmat qiladi.
Asosiy maqsad, milliy libosimizni zamonaviy liboslarda ko`rsatish va ushbu liboslarimizni dunyoga yoyish hamda dizaynerlarimizni dunyoga tanitish.
Shouda eng ko`zga ko`ringan, professional, taniqli dizaynerlar o`z to`plamlari bilan ishtirok etadilar. Bu erda ham pret-a-porte (zamonaviy moda yo`nalishiga mos kichik hajmda chiqariladigan liboslar) hamda bashang, milliy uslubdagi liboslar ham bo`ladi. Bu liboslarning hammasida, albatta, milliylik elementlarini uchratasiz. Dizaynerlarga bizning asosiy qo`ygan talabimiz ham shunday.
Hozir pandemiya payti, odatda biz mana shunaqa tadbirlarga juda ko`p chet ellik dizaynerlarni ham jalb qilardik. O`zlari ham sayt va ijtimoiy tarmoqlardan eshitib, bunday tadbirlarga kelishardi. Ularning maqsadi, bizning madaniy merosimizni ko`rgan holda, kelajakdagi ijodiy ishlarida, to`plamlarida shu ko`rgan, o`rganganlarini qo`llashdan iborat.
Shuni ham aytib o`tish kerakki, dunyoda ko`p dizaynerlarimiz Dolche Gabbanadan tortib Roberto Kavalligacha o`zining har bitta to`plamida bizning yo matomiz yo andozamizni, yoki bo`lmasa dizaynimizni ishlatishadi.
Eng muhimi shuki, Evropadagi har bir moda haftaligi namoyishlarida albatta, bu o`zbek modasi, o`zbek dizayni deb aytib o`tishadi. Demak mana shu tadbirlarimizning ahamiyati ham shundaki, biz dunyoga o`zimizni milliy merosimiz, milliy liboslarimizni targ`ib qilyapmiz va o`tkaziladigan tadbir buning uchun yana bir imkoniyat beradi.
