15-18 dekabr kunlari bo`lib o`tadigan «O`zbekiston madaniy merosi» haftaligida o`zbek kinomotagrafiyasiga oid bir qancha yangiliklar bo`lishi kutilmoqda. Ulardan biri «Faridaning ikki ming qo`shig`i» kinofilmining namoyishi bo`lib o`tadi.
Bugun «O`zbekkino» MA tomonidan buyurtma qilinib, qo`llab-quvvatlanayotgan badiiy filmlar “Oskar” tomon borayotgani quvonarli. Bu haqda taniqli rejessiyor Rashid Malikov o`z fikrlarini bildirib o`tdi.
— Ayni paytda juda katta tadbirga tayyorgarlik ko`rilyapti deyishim mumkin. Tez orada O`zbekistonga madaniy meros bo`yicha butun dunyo mutahassislari tashrif buyurishadi. Haftalik doirasid o`tkaziladigan Kongressda katta bahs-munozaralar bo`lib o`tadi. Chunki O`zbekiston nafaqat O`rta Osiyoda balki butun dunyoda madaniy merosga boyligi bilan ajralib turadi. Samarqand, Hiva, Buhorodagi bir qancha obidalar, kitoblar, miniatyuralar... umuman misol qilib ko`rsatiladigan madaniy meros durdonalarimiz juda ko`p.
Kongressning uchinchi kuni esa aynan kinoga bag`ishlanadi. O`zbekiston kinomatografiyasi dunyodagi eng azaliy qadriyatlardan biri deyishimiz mumkin. Milliy kinomatografiyamiz hatto rivojlangan Indoneziya, Arab Amirliklari, Xitoy kabi bir qancha davlatlarning kinomotagrafiyasidan ham yoshi ulug` hisoblanadi.
Ikkinchidan esa kinolarimizning o`zi ham haqiqiy meros deyishga arziydigan filmlar. “Tohir-Zuhra”, “Alisher Navoiy”, bulardan avvalgi ovozsiz kinofilmlar shular jumlasidan.
Ushbu kongress doirasida aynan mana shu kabi kinotasmalarning tarixi va o`ziga xos afzalliklari muhokama qilinadi.
Bundan tashqari, 6 ta film va 100 ta multfilm restavrasiya qilinib, O`zbekistonga qaytarilyapti. Biz hozir ekranlarda ko`rayotgan eski filmlarning sifati talabga javob bermaydi, ular aslidagi kabi emas. Shu kunlarda suratga olinayotgan aksariyat yangi filmlar ham bir kun kelib, madaniy merosimizning bir bo`lagiga aylanadi degan umiddaman.
Mohigul DIYoRXO`JAEVA