Buxoro shahar prokurori J.Fozilovning ijtimoiy tarmoqlar orqali qilgan murojaatida keltirilgan vajlarni o`rganish yuzasidan Respublika idoralararo komissiyasi tuzildi. Bu haqda O`zbekiston Respublikasi Prezidentining Xalq qabulxonasi ma`lum qildi.
Joriy yil 11 dekabr kunidan buyon internet tarmog`i orqali Buxoro shahar prokurori J.Fozilov tomonidan tarqatilgan videomurojaatlarda prokuratura organlarining ayrim xodimlari tomonidan qonunbuzarlik holatlariga yo`l qo`yilayotganligi ma`lum qilingan.
J.Fozilovning vajlarini sinchkovlik bilan har tomonlama va xolisona tekshirish hamda holatga baho berish maqsadida joriy yil 14 dekabr kuni Respublika idoralararo komissiyasi tuzildi.
Komissiya tarkibiga O`zbekiston Respublikasi Prezidenti Administrasiyasi, Oliy Majlis Senati, Prezident huzuridagi tadbirkorlik sub`ektlarining huquqlari va qonuniy manfaatlarini himoya qilish bo`yicha vakil, Korrupsiyaga qarshi kurashish agentligi, Adliya vazirligi, Bosh prokuratura, shuningdek O`zbekiston Respublikasi Prezidentining Buxoro viloyatidagi Xalq qabulxonasining mas`ul xodimlari kiritildi.
Komissiya murojaatda keltirilgan qonunbuzarlik holatlarini joyiga chiqqan holda, J.Fozilovning barcha vajlarini bevosita o`zining ishtirokida chuqur va xolisona o`rganilishini tashkil etadi.
Tekshirish natijalari bo`yicha qo`shimcha ravishda xabar beriladi, deyilgan xabarda.
Ma`lumot uchun: sal avval ijtimoiy tarmoqlarda Buxoro shahri prokurori Jasur Fozilovning murojaati aks etgan video tarqaldi. Videoda shahar prokurori unga nisbatan xizmat tekshiruvi olib borilayotganini aytib, uning yakunlari bo`yicha qonun buzilishlar aniqlangan taqdirda buning uchun javob berishga tayyorligini ma`lum qilgan. Shuningdek, Fozilovning so`zlariga ko`ra, xizmat tekshiruviga sabab bo`lgan murojaat bosh prokuror Nig`matilla Yo`ldoshevga aloqador bo`lgan tadbirkor tomonidan qilingan. Murojaatda prokuror Prezident Administrasiyasi rahbaridan mazkur holatni nazoratga olishni so`ragan edi.
Bosh prokuraturaning 11 dekabrdagi bayonotiga ko`ra, Buxoro shahar prokurori Jasur Fozilovga nisbatan xizmat tekshiruvi tayinlangani munosabati bilan u 2 dekabr kuni vazifasini bajarishdan vaqtincha ozod qilingan. Bunga Buxoro shahridagi tadbirkorlardan birining prokuror Fozilov ustidan yozib bergan shikoyat arizasi sabab bo`lgani aytilgan edi.
