Avval xabar berganimizdek, 15 dekabrda Toshkentda ana`anaviy Madaniy meros haftaligining tantanali ochilish marosimi bo`lib o`tdi. Shu kuni haftalikning muhim tadbiri IV Xalqaro kongress ham o`z ishini boshladi. Unda nufuzli xalqaro tashkilotlar vakillari va xorijllik olimlarning dunyo madaniy merosiga hissa bo`lib qo`shilgan qadimiy boyliklarimiz haqidagi tadqiqotlariga oid ma`ruzalari tinglandi.
Yoshlar ijod saroyida tashkil qilingan milliy hunarmandchilik va xalq amaliy san`ati namunalari ko`rgazmasi tadbir mehmonlarida chuqur taassurot qoldirdi. Unda kulolchilik, zargarlik, pichoqchilik, gilamdo`zlik, do`ppido`zlik, kashtachilik, to`qimachilik va boshqa hunarmandchilik yo`nalishlarida faoliyat ko`rsatayotgan mohir ustalarimizning ijodiy ishlari, san`at asari darajasidagi qo`l mehnati namunalari namoyish etildi.
Shuningdek, haftalikning ilk kunida ishtirokchilar hamda mehmonlar e`tiboriga milliy dizaynerlarimizning ijod mahsuli bo`lgan rang-barang liboslar jamlanmalari havola etildi. Ushbu modalar namoyishi "Milliy liboslar – yangi renessans durdonalari" deb nomlangan bo`lib, tomoshabinlar tomonidan katta qiziqish bilan kutib olindi.
O`zbekiston dizaynerlar assosiasiyasi direktori Xolida Komilovaning ta`kidlashicha, modalar namoyishida taqdim etilgan kolleksiyalarda o`zbekistonlik dizaynerlarning tarixiy milliy liboslarimiz bo`yicha ko`p yillik tadqiqotlari, o`zbek liboslariga professional darajada yondashuvlari o`z aksini topgan. Ushbu tadbirda namoyish etilgan 50 dan ziyod libos namunalari ko`plab iste`dodli dizaynerlar, libos konstruktorlari, san`atshunoslar, tarixchilar va tikuvchilarning mehnati samarasidir.
Manzura BEKJONOVA
