Respublika Yoshlar ijod saroyida Madaniy meros haftaligi va «O`zbekiston madaniy merosi – yangi Renessans poydevori» mavzusidagi IV xalqaro Kongressning uchinchi kuni “O`zbekiston kinematografiyasi: o`tmish, bugun, kelajak” mavzusida konferensiya o`z ishini boshladi.
Mazkur ijodiy kunning birinchi qismida “Xalqaro kinoloyihalar”, “Ustozlar ustozi” va “Katta plandagi kinomeros” bo`limlari asosida o`zbek va jahondagi tajribali kinematografistlarning dolzarb mavzulardagi ma`ruzalari tinglanmoqda.
Jumladan, mahoratli rejissyor Djanik Fayzievning “Buyuk Ipak yo`li” loyihasi va o`zbek kinosidagi koproduksiyalar”, Rossiyada xizmat ko`rsatgan artist Farhod Mahmudovning “Parining sovg`asi”, Valdis Pelshning O`zbekiston Respublikasi Mustaqilligining 30 yilligiga bag`ishlangan “Yangi Renessansga nazar” loyihasi, taniqli prodyuser Aleksandr Kesselning “Quyosh lazzati” filmi taqdimotlari va onlayn videomurojaatlar bo`lib o`tishi ko`zda tutilgan.
Ushbu kun Djanik Fayziev hamda Valdis Pelsh bilan xalqaro memorandum imzolanadi. Respublika Kinofondi direktori Eljon Abbasovning o`zbek kino san`ati tarixiga oid hali hech qaerda e`lon qilinmagan fotografiyalar jamlanmasi taqdimoti bo`lib o`tadi.
Ijodiy kunning ikkinchi qismida dasturga ko`ra, 16:30 da “O`zbekkino” MA buyurtmasiga binoan “Fox music cinema” studiyasi tomonidan suratga olingan, rejissyor Yolqin To`ychievning “Faridaning ikki ming qo`shig`i” badiiy filmining katta premerasi bo`lib o`tadi. Premerada film ijodkorlari ham ishtirok etishi rejalashtirilgan.
