Bugun Madaniy meros haftaligi doirasida O`zbek milliy kinematografiyasi kuni o`tkazilayotganini ma`lum qilgan edik. Ushbu tadbirning eng muhim yangiliklaridan biri "Toshkent xalqaro kinofestivali"ning qayta tiklanishi haqidagi xabar bo`ldi. Bu haqda “O`zbekkino” MA Bosh direktori Firdavs Abduxoliqov Kongress doirasidagi Milliy kinematografiya ijodiy kunida tantanali ravishda e`lon qildilar.
Mazkur xabar barcha ishtirokchilar va mehmonlar tomonidan iliq kutib olindi.
O`zbek milliy kinematografiyasiga oid yana bir muhim voqea rossiyalik taniqli teleboshlovchi va prodyuser Valdis Pelsh va mahoratli rejissyor Djanik Fayziev bilan xalqaro memorandum imzolandi.
Eslatib o`tamiz, ijodiy kun davomida Respublika Kinofondi direktori Eljon Abbasovning o`zbek kino san`ati tarixiga oid hali hech qaerda e`lon qilinmagan kinofotografiyalar jamlanmasi taqdimoti bo`lib o`tadi.
Dasturga ko`ra, 16:30 da “O`zbekkino” MA buyurtmasiga binoan “Fox music cinema” studiyasi tomonidan suratga olingan, rejissyor Yolqin To`ychievning “Faridaning ikki ming qo`shig`i” badiiy filmining katta premerasi bo`lib o`tadi. Premerada film ijodkorlari ham ishtirok etishi rejalashtirilgan.
