Бугун Маданий мерос ҳафталиги доирасида Ўзбек миллий кинематографияси куни ўтказилаётганини маълум қилган эдик. Ушбу тадбирнинг энг муҳим янгиликларидан бири "Тошкент халқаро кинофестивали"нинг қайта тикланиши ҳақидаги хабар бўлди. Бу ҳақда “Ўзбеккино” МА Бош директори Фирдавс Абдухолиқов Конгресс доирасидаги Миллий кинематография ижодий кунида тантанали равишда эълон қилдилар.
Мазкур хабар барча иштирокчилар ва меҳмонлар томонидан илиқ кутиб олинди.
Ўзбек миллий кинематографиясига оид яна бир муҳим воқеа россиялик таниқли телебошловчи ва продюсер Валдис Пельш ва маҳоратли режиссёр Джаник Файзиев билан халқаро меморандум имзоланди.
Эслатиб ўтамиз, ижодий кун давомида Республика Кинофонди директори Элжон Аббасовнинг ўзбек кино санъати тарихига оид ҳали ҳеч қаерда эълон қилинмаган кинофотографиялар жамланмаси тақдимоти бўлиб ўтади.
Дастурга кўра, 16:30 да “Ўзбеккино” МА буюртмасига биноан “Fox music cinema” студияси томонидан суратга олинган, режиссёр Ёлқин Тўйчиевнинг “Фариданинг икки минг қўшиғи” бадиий фильмининг катта премьераси бўлиб ўтади. Премьерада фильм ижодкорлари ҳам иштирок этиши режалаштирилган.
