SSV Matbuot xizmati Toshkent shahar sog`liqni saqlash bosh boshqarmasi bosh neonatologi Malika Usmonova bilan bo`lgan suhbatni e`lon qildi.
— Bola neonatolog parvarishidan so`ng onasi qo`liga berilgach, nimalarga e`tibor qaratishi lozim?
— Hamma yangi tug`ilgan chaqaloqlar kabi bu go`daklar ham to`g`ri rivojlanishi uchun nafas olishi va tana haroratining nazorati zarur. Eng muhimi, uning ovqatlanishi, ishtahasi yaxshi bo`lishini doimiy kuzatib borishi kerak. Tana harorati 36,5 dan 37,5 gacha me`yor hisoblanadi. Bolani isitib yuborish ham to`g`ri kelmaydi.
Bunday bolalarni ota-onalari ko`proq bag`rida olib yurishlari maqsadga muvofiq. Tana harorati bir me`yorda bo`lishi bolaning nafas olishi, ko`krak olishi va ichi kelishiga yaxshi yordam beradi. Vaqti-vaqti bilan shifokor ko`rigidan o`tib, audiometriya — eshitish qobiliyatini tekshirish, shu bilan birga, oftalmolog va nevropatolog nazoratida bo`lishlari ham lozim.
— Tajribangizda eng muvaffaqiyatli kichik vaznliligidan parvarish qilgan chaqalog`ingiz haqida gapirib bersangiz...
— Bunday misollarimiz ko`p. Masalan, bundan ikki yil avval Risolat ismli qizchamiz 480 gramm vazn bilan homiladorlikning 25-haftasida tug`ildi. Uning parvarishi, muddatiga etib olishi, sog`lom bo`lib uyiga chiqib ketishi uchun uch yarim oy vaqt ketdi. Hozir uning sog`lig`i juda yaxshi.
Qizaloq 2 yoshga to`ldi. Har gal uni ko`rganimda quvonib ketaman. Shu jajji murg`akkinaning yashab qolishi uchun qilgan mehnatimiz besamar ketmaganidan xursand bo`laman.
— Aytingchi, ushbu sohada mutaxassislar etarlimi, yurtimizda ularning xalqaro talablarga mos ravishda tajriba orttirishlari uchun sharoitlar yaratilganmi?
— Mamlakatimiz oliy ta`lim muassasalarida neonatologiya kafedralari, bir qator milliy trenerlar va bosh neonatologlar bu sohaning rivojlanishiga o`zlarini mas`ul deb hisoblaydilar.
Joylarda ham amaliyot yuqori darajada bo`lishi uchun qo`llanmalar, standartlar tayyorlashadi, kuratorlik chiqishlari qilib, joylarda amaliy yordam ko`rsatishadi. Mutaxassislar viloyatlardan muntazam ravishda Respublikamiz perinatal markazlarida, Rossiya va boshqa davlatlarda o`z malakalarini oshirib kelmoqda.
2018 yil noyabr oyida mamlakatimizda shu yo`nalishda yirik konferensiya o`tkazdik. Oxirgi yillar hisoboti, neonatal yutuqlarimiz va rejalarimiz haqida fikr yuritdik. Ishtirok etgan xalqaro tashkilotlar vakillari O`zbekistonda neonatal xizmat jahon talablariga mos ravishda rivojlanib borayotganini e`tirof etishdi. Bu bizga berilgan yuqori baho edi.
— Neonatologiya sohasi viloyatlarda ham yo`lga qo`yilganmi? U erdagi mutaxassislar darajasiga qanday baho berasiz?
— Viloyatlardagi hamda markazlardagi muassasalarda jihozlar bir xil taqsimlangan. Hududlardagi bosh neonatologlar va barcha neonatologlar bir-birlari bilan uzviy bog`lanishgan.
Markazdagi etakchi klinika va kafedra xodimlaridan o`z vaqtida onlayn shaklda maslahat olish imkoni bor. Har bir yangi ma`lumot darhol barcha mutaxassislarga etkaziladi. Kuzatuvlarimiz va hisobotlar viloyatlarda ham neonatal yutuqlarimiz yomon emasligini ko`rsatib turibdi.
