O`tgan 2020 yilda jami 27 nafar sudyaning vakolati muddatidan ilgari tugatilib, lavozimidan ozod qilindi. Bu haqda O`zbekiston Sudyalar oliy kengashi matbuot xizmati ma`lum qildi.
Unga ko`ra, 3 nafar sudya boshqa ishga o`tganligi (ular orasida respublika rahbarlik idoralarida mas`ul vazifaga tayinlangani ham bor) sabab vakolati muddatidan avval tugatilgan. Cudyalik qasamyodi va odob-axloq qoidalarini hamda odil sudlovni amalga oshirishda qonun talablarini qo`pol ravishda buzgan 12 nafari esa so`zsiz tizimdan chetlatildi (ulardan biri jinoiy javobgarlikka tortilgan). Shuningdek, o`z xohishiga ko`ra ariza bergan 5 nafar sudya ham endilikda tizimda yo`q.
Lavozimidan ozod etilganlarning qariyib to`rtdan birini vafoti munosabati bilan vakolati muddatidan ilgari tugatilgan sudyalar tashkil etadi. Ya`nikim, koronavirus balosi sudyalar korpusining 7 nafar vakilini hayotdan barvaqt olib ketdi.
