So`nggi kunlarda O`zbekistonda havo harorati keskin sovib ketdi. Xo`sh, sovuq ob-havo qachon chekina boshlaydi? «Xalq so`zi» nashri ushbu savolga oydinlik kiritdi.
Ma`lum qilinishicha, 10 yanvardan boshlab havo harorati sekin-asta ko`tariladi va 2-7 daraja iliq bo`ladi.
«Yangi 2021 yil keldi, ammo bizning mamlakatimiz bo`ylab ob-havo sharoitini hali ham markazi Sibir hududlari ustida joylashgan sovuq antitsiklon periferiyasi belgilamoqda. Yangi yilning birinchi ish haftasi davomida juda yuqori bosimli maydon, anomal sovuq ob-havoni keltiradi.
Kechalari sovuq 5-10 darajagacha, shimolda va cho`l hududlarida esa 12-17 darajagacha pasayadi, hafta oxirigacha esa kunduz kunlari havo harorati 0-5 daraja sovuqdan oshmaydi. Hafta davomida havo harorati o`rtacha yillik qiymatlardan 8-10 darajaga past bo`ladi.
Respublikaning ba`zi joylarida tuman kuzatiladi. Ushbu davrda tog`li hududlarda qor ko`chishi xavfi bor».
