Armaniston Prezidenti Yangi yilni Londonda oilasi va nabiralari bilan kutib olgan edi. 5 yanvar kuni Armanistonning "Armenpress" davlat axborot agentligi Prezident Londondagi ta`tili davomida koronavirus infeksiyasini yuqtirib olganini ma`lum qildi.
Interfaksning xabariga ko`ra ayni kunlarda Armaniston prezidenti Armen Sarkissianning ahvoli og`ir. Shifokorlar Sarkissianning holati yuzasidan quyidagilarni ma`lum qilgan:
"Koronavirus infeksiyasi tufayli izolyasiya qilingan Armaniston Prezidentining kasalligi og`ir shaklda, ushbu holatga xos xavfli alomatlar mavjud. Prezidentni davolashni nazorat ostida davom ettiramiz".
Prezident Matbuot xizmati xabariga ko`ra, "vaziyat barqarorlashgandan va shifokorlarning ruxsatidan so`ng Armaniston prezidenti Erevanga qaytadi".
Ma`lumot uchun, Amerikaning Jons Xopkins universiteti, Armanistonda jami 161 415 koronavirus kasalligi aniqlangani, 2 908 kishi vafot etganini e`lon qildi.
