10 yanvar kuni ijtimoiy tarmoqlarda “Toshkent viloyati Nurafshon shahrida IIO xodimlari uchun qurilgan ipoteka uylari shu vaqtdan talabga javob bermaydi, qator kamchiliklari bor” izohi bilan xabar tarqatildi.
Xabarda keltirib o`tilgan holatlar bugunning o`zida Toshkent viloyati IIBB rahbariyati tomonidan nazoratga olindi va ijobiy hal qilish choralari ko`rildi.
O`zbekiston Respublikasi Prezidentining bir qator qaror va farmonlari hamda IIVning tegishli buyrug`i bilan, respublika, shu bilan birga, Toshkent viloyatida ham IIO xodimlarini uy-joy bilan ta`minlash maqsadida ipoteka krediti asosida arzonlashtirilgan uylar qurib berilmoqda.
Jumladan, Nurafshon shahrida qurilayotgan 6 ta ko`p qavatli uyning 3 tasida qurilish yakunlangan va yana 3 tasida tugatilish arafasida.
Ijtimoiy tarmoqlarda tarqatilgan holat yuzasidan voqea joyi (Nurafshon shahri Qumariq MFYda IIO xodimlari uchun qurilayotgan ko`p qavatli uy)ga viloyat IIBB boshlig`ining o`rinbosari va ushbu uy-joy qurilishi uchun mas`ul bo`lgan rahbarlar chiqishdi.
Holat rahbariyat tomonidan o`rganilib, nazoratga olindi. Xato kamchiliklar muhokama qilinib, muammoni ijobiy hal etish choralari ko`rildi.
Kelgusida bu kabi holatlarning oldini olish maqsadida, yashash uchun topshirilayotgan har bir xonadonni, yana bir belgilangan tartib bo`yicha ko`zdan kechirish va kamchiliklarini bartaraf etish bo`yicha choralar belgilandi.
