2021 yil 19 yanvar kuni Oliy Majlis Qonunchilik palatasining Innovasion rivojlanish, axborot siyosati va axborot texnologiyalari masalalari qo`mitasi tomonidan “Lisenziyalash, ruxsat berish va xabardor etish tartib-taomillari to`g`risida”gi qonun loyihasini ikkinchi o`qishga tayyorlashga bag`ishlangan fraksiyalararo munozara o`tkazildi. Bu haqda Qonunchilik palatasi sayti yozmoqda.
Unda Oliy Majlis Qonunchilik palatasidagi siyosiy partiyalar fraksiyalarining vakillari, Vazirlar Mahkamasi, Adliya vazirligi, O`zbekiston Savdo-sanoat palatasi, O`zbekiston nodavlat notijorat tashkilotlari milliy assosiasiyasining mutaxassislari hamda ommaviy axborot vositalari xodimlari qatnashdilar.
Ta`kidlash joiz, “Lisenziyalash, ruxsat berish va xabardor etish tartib-taomillari to`g`risida”gi qonun loyihasi Oliy Majlis Qonunchilik palatasining 2021 yil 13 yanvar kuni bo`lib o`tgan majlisida birinchi o`qishda qabul qilingan edi.
Qonun loyihasida lisenziyalash, ruxsat berish va xabardor etishga oid huquqbuzarlik uchun yuridik shaxslarlarga nibatan jarima qo`llash institutini joriy etish nazarda tutilayotgani qizg`in muhokamalarga sabab bo`ldi. Bunda yuridik shaxs jarimani bir oy davomida ixtiyoriy to`lagan, shuningdek, amalga oshirish uchun talab etiladigan lisenziya, ruxsat etish xususiyatiga ega hujjatni berish to`g`risida murojaat qilgan hamda xabarnoma yuborganda, tayinlangan jarima miqdorining etmish foizi undirilishiga oid rag`batlantiruvchi norma belgilanmoqda.
Bahs-munozara hamda tortishuvlarga boy o`tgan tadbirda har bir fraksiya a`zolari loyiha yuzasidan o`z qarashlarini bildirdi.
Xususan, O`zLiDeP fraksiyasi a`zosi Shuhrat Sharafutdinov ta`kidlaganidek, qonun loyihasining muhimligini, joriy etilishi nazarda tutilayotgan yuridik shaxslarga javobgarlikni belgilash institutini har tomonlama jiddiy muhokama qilish zarur. Shu bilan birga, loyihadagi yana bir masalaga qonun tashabbuskorlarining e`tiborini qaratdi. Yurtdoshlarimiz orasida o`zining shaxsiy avtotransportidan foydalangan holda yo`lovchi tashish xizmatini ko`rsatish orqali faoliyat yuritayotganlar ko`pchilikni tashkil etadi. Mazkur turdagi faoliyatni loyihada belgilangan “Amalga oshirilishi uchun lisenziya talab qilinadigan” faoliyat turidan chiqarib, “Vakolatli organlarni xabardor qilish tartibida amalga oshiriladigan” faoliyat turlari ro`yxatiga kiritishni, ya`ni taksi xizmatini ko`rsatayotgan tadbirkorlarimizga o`z faoliyatlarini qonuniy amalga oshirishlarida engillik yaratishni ilgari surdi. Ushbu faoliyat turini bir ro`yxatdan ikkinchi ro`yxatga olinishi haydovchilarga yo`lovchilarni shahar, shahar atrofida va shaharlararo engil avtomobillarda tashish uchun ruxsatnoma olish jarayonini engillashtiradi va to`lov summasini adolatli belgilanishiga olib keladi.
O`z navbatida, “Milliy tiklanish” demokratik partiyasi fraksiyasi a`zosi O`ktam Islomov qonun loyihasini qabul qilish orqali barcha turdagi lisenziyalash, ruxsat berish va xabardor etish tartib-taomillarining elektronga o`tishi yangilik ekanligini aytib, qonun qabul qilinganidan keyin bu turdagi xizmatlarning to`la elektron shaklga o`tishi uchun ko`p vaqt ketishi sababli ushbu jarayonning muddatlarini nazorat ostiga olish taklifini bildirdi.
“Adolat” SDP fraksiyasi a`zosi Dilmurod Ismoilov qonun loyihasini ishlab chiqishda bir tomonlama yondoshuvdan qochishga va jismoniy va yuridik shaxslarga qo`llaniladigan jarimalar miqdorini asosli belgilash lozimligini aytib o`tdi. Bundan tashqari, deputat bunday jarimalar qo`llash vakolatli davlat idoralari uchun korrupiyaga yo`l ochishi mumkinligini ta`kidladi.
O`zXDP fraksiyasi a`zosi Shohista Turg`unova esa, qonun loyihasini fraksiya to`liq qo`llab-quvvatlashini, biroq ayrim masalalarni qayta ko`rib chiqish maqsadga muvofiqligini ta`kidladi. Xususan, lisenziyalash, ruxsat berish va xabardor etish tartib-taomillari ro`yxatiga notarial idoralar va uy bog`chalari kiritilmagan. Uy bog`chalari bilan shug`ullanish qaysidir ma`noda yosh bolalar uchun javobgarlik mas`uliyatini olishi lozim. Shunday takliflardan yana biri bu lisenziyani alohida filiallarga qo`llanmasligidir. Bu turdagi engillik ayrim “ishbilarmonlar” uchun qonunni aylanib o`tishlariga imkon berishi mumkin. Ya`ni, lisenziya olmay turib biror bir katta yuridik shaxs bilan o`zaro til biriktirib, o`zini katta yuridik shaxsning bir filiali sifatida ko`rsatishi mumkin.
O`zbekiston ekologik partiyasi fraksiyasi vakili Mohira Xodjaeva ayrim shaxslar tegishli lisenziyaga ega bo`lmay turib atrof-muhitga zarar etkazayotgani, qolaversa ekologiya inspeksiyalari xodimlari ushbu tadbirkorlar bilan til biriktirish holatlari uchrab turayotganini ta`kidlab, mazkur qonun loyihasini ikkinchi o`qish uchun ishlab chiqish jarayonida ekologiya yo`nalishida tadbirkorlarga lisenziya berish masalasini ham ko`rib chiqishni ta`kidlab o`tdi.
Qizg`in bahs-munozaralarga boy bo`lgan ushbu tadbirda bildirilgan taklif va fikr-mulohazalar qonun loyihasini takomillashtirish jarayonida ko`rib chiqiladigan bo`ldi.
