Buyuk Britaniyada aniqlangan koronavirusning yangi shtammining bolalardagi alomatlari haqida Koronavirusga qarshi kurashish shtabi a`zosi, tibbiyot fanlari doktori Sevara Ubaydullaeva SSV Matbuot xizmatiga quyidagilarni ma`lum qildi:
Unga ko`ra, bolalarda uchragan koronavirus “britancha” shtammining simptomlari quyidagilardan iborat:
- bosh og`rig`i;
- tana xaroratining ko`tarilishi;
- qorinda og`riq;
- kuchli xolsizlik;
- ishtaxaning yo`qolishi;
- tildagi shish yoki qizarish (“qulupnaysimon” til);
- yanoqlar va kaftlarning qizarishi;
- ba`zi bolalarda multitizimli yallig`lanish sindromi, toksik shok, miokardit kabi holatlar ham kuzatilishi mumkin.
“Britancha” shtamm keng tarqalayotgan bo`lsa-da, olimlar tomonidan uni o`rganish davom etmoqda. Virus kasallikning engil yoki simptomlarsiz kechuvida ham turli xil asoratlar keltirib chiqarayotgani aniqlangan.
Mutaxassis yurtdoshlarimizdan o`z sog`liqlarini asrash uchun quyidagi talablarga rioya qilishlarini so`radi:
- britancha shtamm tarqalgan davlatlarga vaqtincha bormay turish;
- oilada, ko`chalarda, korxonalar va tashkilotlarda karantin qoidalariga rioya qilish;
- bolalar ko`p bo`ladigan maskanlar – maktabgacha ta`lim tashkilotlari, maktablar va kollej, lisey, texnikum hamda oliy ta`lim muassasalarida karantin qoidalariga rioya qilish;
- doimiy ravishda niqoblarni qoidaga rioya qilgan ravishda taqish, ijtimoiy masofani saqlash va qo`llarni sovunlab yuvish yoki antiseptik vositalar bilan ishlov berish;
- vitaminlarga boy mahsulotlardan tayyorlangan ovqatlarni iste`mol qilish;
- doimiy jismoniy faollik bilan shug`ullanish.
Shamollash alomatlari paydo bo`lsa, oilaviy shifokorga murojaat qilish, o`z vaqtida shifokor nazoratidan o`tish va samarali davolanish talab etiladi. Shu bilan kasallikni yoki uning asoratlarini oldini olish mumkin.
