Navoiy viloyati IIB TvaEQKB xodimlari tomonidan olib borilgan surishtiruv harakatlari davomida, Toshkent shahar Yakkasaroy tumanida yashovchi 1969 y.t. fuqaro Q.M. Navoiy shahrida yashagan 1998 y.t. M.G`.ni dastlab, Toshkent shahrida joylashgan savdo do`konlarida ishlatishni maqsad qiladi va aldab olib ketadi. Biroq, berilgan va`dalar va`daligicha qolib, oradan hech qancha vaqt o`tmasdan nafsi hakalak otgan ayol endigina 23 bahorni qarshilagan qizni 2020 yilning oktyabrida I.Karimov nomidagi Toshkent xalqaro aeroporti orqali Turkiyaga olib chiqib ketadi. Ayon bo`lishicha, ayol degan nomga nomunosib Q.M. g`arazli va past maqsadlarni ko`zlab, ushbu davlatda mavjud qarzi evaziga uni Turkiyada yashovchi fuqarolarga sotib yuborgan. Bu haqda Navoiy viloyati IIB Axborot xizmati xabar berdi.
Mazkur holat yuzasidan Navoiy viloyati IIB huzuridagi Tergov bo`linmasi tomonidan Jinoyat kodeksining 135-moddasi 2-qismi “z”bandi (Jabrlanuvchini O`zbekiston Respublikasining davlat chegarasidan olib o`tgan holda yoki uni chet elda qonunga xilof ravishda ushlab turgan holda) bilan jinoyat ishi qo`zg`atilgan.
Hozirda tergov harakatlari olib borilmoqda.
