Prezident Chirchiq shahar Shodlik mahallasidagi ko`p qavatli uylar qurilishi bilan tanishdi

Prezident Shavkat Mirziyoev Chirchiq shahar Shodlik mahallasida qurilgan 4 ta 16 qavatli uy qurilishi bilan tanishdi. Bu haqda Prezident Matbuot kotibi xabar berdi.

Ularda jami 288 xonadon bo`ladi. To`rtalasi ham shu yil foydalanishga topshiriladi.

17 ta xonadon nogironligi bor hamda uy-joyga muhtoj ayollarga, 15 tasi o`z sohasida alohida o`rnak ko`rsatayotgan yosh oilalarga ajratilgan.

Shu erda Chirchiq shahrini rivojlantirish bo`yicha bosh reja muhokama qilindi. Yangi turar joylar qurish, eski uylarni renovasiya qilish, bo`sh turgan binolardan skmarali foydalanib, Toshkent shahridagi ayrim ishlab chiqarish korxonalarini shu erga ko`chirish hamda yangi loyihalarni joylashtirish bo`yicha ko`rsatmalar berildi.

- Chirchiqni innovasion, investision shahar qilish mumkin. Shuning uchun hamma binolarni inventarizasiyadan o`tkazish kerak. Bu erda hamma infratuzilma bor. Avtomobil va temir yo`llarning o`tkazuvchanligini oshirish, jamoat transportini rivojlantirish kerak. Qulaylik yaratilsa, aholi ham, ishbilarmonlar ham keladi, - dedi Shavkat Mirziyoev.

Prezident Chirchiq shahar issiqlik ta`minot korxonasini ham borib ko`rdi.

 Chirchiq shahrida jami 14 ta qozonxona bor. Shulardan biri 1957 yilda qurilgan. Bu qozonxona ochiq tizimda ishlaydi. Ya`ni, shahar ichimlik suvi tarmog`idan suv olib, uni isitib, xonadonlarga tarqatadi. Bu ortiqcha suv va gaz yoqilg`isi sarfini yuzaga keltirayotgan edi.

 Shu bois bu erda Turkiya texnologiyasi asosida yangi qozonxona barpo etilmoqda. Loyihaning qiymati 16 million dollardan ziyod bo`lib, Jahon banki krediti asosida moliyalashtiriladi.

 Yangi qozonxonaning quvvati 75 megavatt bo`ladi. Qurilish ishlari uch bosqichda amalga oshiriladi. Modernizasiya natijasida shaharda 24 kilometr issiqlik quvuri tortilib, 175 ta ko`p qavatli uy, 19 ta ijtimoiy soha ob`ektlari issiqlik tizimi bilan sifatli ta`minlanadi. 12 million metr kub tabiiy gaz, 3,4 million kilovatt elektr energiyasi, 300 ming kub suv tejaladi. Atmosferaga chiqayotgan 4,7 ming tonna gaz ushlab qolinadi.

 Shu erning o`zida viloyatda elektr energiyasi, issiqlik, ichimlik suvi ta`minoti hamda shaharlarda kommunal xizmatlarni yaxshilash bo`yicha rejalar taqdimot o`tkazildi.