Shavkat Mirziyoev xalqaro konsultantlar bilan uchrashdi (foto)

O`zbekiston Respublikasi Prezidenti Shavkat Mirziyoev 23 mart kuni xalqaro konsultantlar – Alfred Guzenbauer, Aleksandr Kvasnevskiy va Shtefan Fyuleni qabul qildi. Bu haqda Prezident Matbuot xizmati xabar berdi.

Xalqaro konsultantlar guruhining asosiy vazifasi mamlakatimizning Evroittifoq davlatlari bilan ko`p qirrali hamkorligini rivojlantirish va kengaytirishga, islohotlar dasturini amalga oshirishda xorijning ilg`or tajribasini o`rganish va joriy etishga, investisiya va ishbilarmonlik muhitini takomillashtirishga, O`zbekiston iqtisodiyotiga to`g`ridan-to`g`ri investisiyalar va ilg`or texnologiyalarni jalb qilishga, Evropa ishbilarmon doiralari bilan sheriklikning samarali mexanizm va vositalarini shakllantirishga ko`maklashishdan iborat.

Ta`kidlash joizki, turli yillarda yuksak davlat lavozimlarini egallagan konsultantlar bugungi kunda Evropadagi rasmiy, ishbilarmon va jamoatchilik doiralarida yuqori xalqaro nufuzga ega bo`lib, etakchi konsalting, investisiya va sanoat kompaniyalarida ishlab, salmoqli tajriba to`plaganlar.

Xususan, «Gusenbauer Projektentwicklung & Beteiligung» konsulting kompaniyasining ta`sischisi Alfred Guzenbauer 2000-yillarda Avstriya Federal kansleri bo`lib faoliyat yuritgan. «Amicus Europae» fondi rahbari Aleksandr Kvasnevskiy Polsha Prezidenti bo`lgan. Bugungi kunda «CITIC Europe Holdings» kompaniyasi maslahatchisi sifatida faoliyat ko`rsatayotgan Shtefan Fyule Evropa Ittifoqining kengayish va yaxshi qo`shnichilik siyosati masalalari bo`yicha komissari lavozimida muvaffaqiyatli ishlagan.

Uchrashuvda mamlakatimizni isloh qilish va institusional jihatdan rivojlantirishning dolzarb masalalari yuzasidan ochiq va konstruktiv fikr almashildi.

Mehmonlar O`zbekistonda amalga oshirilayotgan yangilanishlar dasturini yuqori baholadilar va to`liq qo`llab-quvvatladilar. Ayniqsa, koronavirus pandemiyasi bilan bog`liq murakkab sharoitlarda olib borilayotgan ijtimoiy-iqtisodiy siyosatning yutuqlari va aniq natijalari, shuningdek, O`zbekistonning global va mintaqaviy iqtisodiy jarayonlarga integrasiyalashuvi sari sezilarli sa`y-harakatlari alohida qayd etildi.

Konsultantlarning O`zbekistonda iqtisodiy islohotlarning uzoq muddatli strategiyasini tayyorlash, davlat boshqaruvi tizimini yanada takomillashtirish, mamlakatimizning xorijiy sheriklar bilan o`zaro manfaatli munosabatlarini kengaytirishga doir tavsiyalari ko`rib chiqildi.

Yurtimizda investisiya muhitini yaxshilash va uning shaffofligini oshirish, bozor mexanizmlarini keng joriy etish va raqobat muhitini shakllantirish, bank-moliya sohasi va kapital bozorini rivojlantirishga alohida e`tibor qaratildi.

Konsultantlar, shuningdek, iqtisodiyotning izchil transformasiya qilinayotgani va xorijiy kapital uchun ochiqligi ortayotgani tufayli Evroittifoq mamlakatlari bilan investisiya va innovasiyalar borasidagi hamkorlikni kengaytirish uchun katta imkoniyatlar shakllanayotganini qayd etdilar.

O`zbekiston bilan EI o`rtasidagi hamkorlikning bugungi yuksak darajasini saqlash, o`zaro manfaatli aloqalarni mustahkamlash va amaliy mazmun bilan boyitish, kengaytirilgan sheriklik va hamkorlik to`g`risidagi bitimni tez fursatda qabul qilish hamda mamlakatimizning Jahon savdo tashkilotiga qo`shilishini qo`llab-quvvatlash masalalari ustuvor ahamiyatga ega ekani ta`kidlandi.

Savdoni liberallashtirish hamda o`zaro tovar ayirboshlash va investisiyalarni ko`paytirishga to`sqinlik qilayotgan g`ovlarni bartaraf etish, bozorlarga chiqish masalalarida hamkorlik qilish mexanizmlari ham ko`rib chiqildi.

Uchrashuv yakunida yaqin hamkorlik va faol almashinuvlarni davom ettirish to`g`risida kelishuvga erishildi. Yaqin istiqboldagi amaliy hamkorlikning birinchi galdagi vazifalari va formati kelishib olindi.