Xabar berilganidek, bugun, 24 aprel kuni O`zbekiston Respublikasi Oliy Majlisi Senatining o`n to`rtinchi yalpi majlisining ikkinchi ish kuni bo`lib o`tmoqda.
Kun tartibidagi masalalarga o`tishdan avval Oliy Majlis Senati Raisi Tanzila Narbaeva jamoat arbobi, O`zbekiston Qahramoni, senator Hasan Norbekovich Normuradovning vafot etgani to`g`risidagi xabar barchani chuqur qayg`uga solganini ta`kidlab, hamdardlik bildirdi. Bu haqda Senat Axborot xizmati xabar qildi.
– Hasan Norbekovich uzoq yillar jamiyat va davlat hayotining turli yo`nalishlarida halol mehnat qilib, el-yurt hurmatini qozongan fidoyi va jonkuyar inson edi, – dedi Senat Raisi T.Narbaeva. – Hasan aka bilan birga ishlash nasib qilgan har bir inson, shu jumladan, o`zim ham, u kishining kamtarlik, samimiylik va qat`iyatlik fazilatlariga havas qilar edik. Ayniqsa, Xasan Norbekovich so`nggi yillarda davlatimiz rahbari tomonidan olib borilayotgan islohotlarni Samarqand viloyatida bekamu-ko`st amalga oshirishda, mahallalarda barqaror ma`naviy-ma`rifiy muhitni qaror toptirishda viloyat nuroniylariga etakchilik qilib kelganliklari tahsinga sazovor.
Yaqinda Samarqandga tashrif chog`ida Prezidentimiz ham u kishining holidan xabar olib, davlat va jamoat oldidagi ko`p yillik mehnatlarini samimiy e`tirof etib, hurmat-ehtirom ko`rsatgan edilar.
O`zbekiston Respublikasi Oliy Majlisi Senati Xasan Norbekovich Normuradovning oila a`zolari va yaqinlariga, qolaversa, butun Samarqand jamoatchiligiga chuqur hamdardlik izhor etadi!
