Samarqandda 17 kishi ishtirokida ommaviy bezorilik yuz berdi

Samarqand viloyati Pastdarg`om tumanida 25 aprel, yakshanba kuni «Lacetti» haydovchisi orqasidagi mashinani qisib harakatlangani sabab 17 kishi ishtirokida ommaviy janjal sodir bo`ldi. Bu haqda Ichki ishlar vazirligi huzuridagi Tergov departamenti axborot xizmati ma`lum qildi.

Xabarga ko`ra, holat soat 19:00 atrofida Rovot—Bog`onali qishlog`i yo`nalishida sodir bo`lgan. Rovot qishlog`ining ichki yo`liga qayrilish qismida M.B. ismli 51 yoshli  erkak «Lasetti»ni boshqarib kelayotganida uning orqa tomonidan harakatlanib kelayotgan 22 yoshli A.M. ismli yigit boshqaruvidagi «Lasetti»ni qisib yuborgan. Shundan so`ng yigit va uning yo`lovchilari 36 yoshli erkak R.U., 24 yoshli yigit A.T., 18 yoshli yigit A.F.lar haydovchi M.B.ni haqorat qilgan. Oqibatida Rovot va Bog`onali qishlog`ida yashovchi jami 17 nafar fuqaro o`rtasida janjal kelib chiqib, bir-birlarini urib do`pposlagan.

Qayd etilishicha, olib borilgan tergovga qadar tekshiruv davomida, ushbu janjalda faol ishtirok etgan 17 nafar fuqarodan 15 nafari turli ko`rinishdagi tan jarohatlari olgani, ulardan 3 nafari ayol kishi ekani ma`lum bo`lgan.

Mazkur holat yuzasidan Pastdarg`om tumani Tergov bo`limi tomonidan Jinoyat kodeksining 277-moddasi 3-qismi «g» bandi (Bezorilik) bilan jinoyat ishi qo`zg`atilgan. Hozirda tergov davom etmoqda.