Mana, bir oydirki, yurtimizda vaksinasiya jarayonlari davom etmoqda. Ammo, taassufki, kasallik qayd etilish bo`yicha antirekordlar ham qayta-qayta yangilanib turibdi. Bunga aholi orasida karantin tartiblariga bepisand bo`lish holatlari asosiy sabab bo`lmoqda.
Masalan, 1 aprel kuni:
5018 nafar fuqaro emlangan,
mamlakatimizda 189 ta yangi kasallanish holati qayd etilib, jami kasallanganlar soni 83 239 nafarga etgan.
30 aprelda esa:
emlanish ko`rsatkichi 797 781 nafarga etgan,
442 ta yangi kasallanish aniqlanib, umumiy kasallanish ko`rsatkichi 91 250 nafarga etgan.
E`tibor bering, qariyb bir oy davomida 800 ming nafarga yaqin aholi kasallikka qarshi emlangan, 8 ming nafardan ortiq fuqaro kasallikka yo`liqqan. Bu har 100 ta emlanish holatiga 1 ta kasallanish holati to`g`ri kelyapti degani. Ta`kidlash lozimki, hali virusga qarshi vaksina olgan hech bir fuqaroda koronavirus bilan kasallanish holati aniqlanmadi. Shunday ekan, hamyurtlarimiz vaksinasiya jarayonlarida faol bo`lishlari kasallik tarqalishini to`xtatishning asosiy omili bo`lishi mumkin.
Ta`kidlash lozimki, oy oxiriga kelib xavf osti guruhiga kiritilgan aholining 25,3 foiz qismi koronavirusga qarshi emlandi. Ularning nisbati quyidagicha:
65 yosh va undan katta fuqarolar — 350 263 nafar;
tibbiyot xodimlari — 265 217 nafar;
maktab o`qituvchilari — 117 384 nafar;
maktabgacha ta`lim muassasalari xodimlari — 36 699 nafar;
surunkali kasalligi bor fuqarolar — 28 218 nafar.
Hurmatli yurtdoshlar, kasallik tarqalishining oldini olishning ikki chorasi bor: karantin tartiblariga amal qilish va emlanish. Agar shu ikki chorani birdek ishga solsak, koronavirusni engib chiqishimiz ehtimoli ikki karra oshgan bo`ladi.
